A Sección Segunda da Audiencia Provincial de Pontevedra absolveu ao condutor dun camión que embistió a un vehículo que se achaba avariado na AP-9 ao seu paso pola cidade do Lérez, na zona que pasa por baixo da ponte de A Barca.
O accidente, que se produciu en xaneiro de 2016, saldouse con dous mozos de Campelo feridos graves, un dos cales acabou falecendo poucas semanas máis tarde por mor das lesións sufridas polo brutal impacto.
O ditame do tribunal provincial vén resolver un recurso presentado contra a sentenza, xa absolutoria, ditada no seu momento polo xulgado de Instrución 1 de Pontevedra. Os xuíces entenden que, máis aló da impericia que puido manifestar o condutor do camión á hora de impactar contra un turismo que se achaba detido na zona da beiravía por unha avaría, non se dan as condicións para atribuírlle un delito de homicidio por imprudencia leve.
Os feitos relatados producíronse sobre as 20.00 horas do 22 de xaneiro de 2016, cando, á altura do punto quilométrico 123 da autoestrada, o camión levou por diante ao Opel Astra da vítima (no que había dous ocupantes máis que tamén sufriron lesións). A sentenza explica que no accidente produciuse de noite nunha zona sen iluminación algunha e cuestiona que o vehículo tivese as luces postas, extremo que non puido determinarse. Si explica que o camión circulaba a 76 km/h, respectando así os límites, e explica que o accidente se produciu tras a colisión do vértice anterior do camión coa parte posterior do coche. A peor parte levoulla o condutor do turismo, que acabou falecendo.
"A invocación de que unha maior atención e unha maior experiencia ou pericia por parte do condutor do camión evitarían o resultado non abonda para realizar o reproche penal que se persegue". Así explica o xuíz, Xosé Xoán Barreiro, un dos motivos da absolución, deixando vía libre, iso si, a outras reclamacións que se poidan levar adiante por outras vías.
