Un veciño da rúa Manuel do Palacio acabou sendo detido polos axentes da Policía Municipal de Pontevedra logo de agredir a un deles que acudira ao seu domicilio para instarlle a que baixase a música, que, segundo os veciños, mantiña a un volume moi elevado na madrugada do sábado ao domingo.
Os feitos relatados ocorreron pasadas as catro da mañá, cando testemuñas presenciais alertaron á Xefatura da Policía Municipal da presenza dun individuo que tiña a música moi alta, o que impedía, ou polo menos dificultaba moito, o descanso dos que residen preto del.
Iso fixo que unha patrulla que se atopaba de garda acudísese no lugar. O investigado, lonxe de depor a súa actitude, agrediu a un dos axentes, incorrendo nun suposto delito de atentado penado con importantes penas de cárcere, polo que quedou detido.
Neste caso, o investigado non incumpría ningunha das restricións que decretou no seu día a Xunta de Galicia con motivo do covid-19, pero si molestaba aos seus veciños.
Xunto a iso, segundo sinalaron fontes municipais, se atopaba baixo os efectos do consumo de sustancias estupefacientes.
A intervención policial si é precisa en casos como este, e os axentes agradecen aos veciños que lles dean conta de feitos como o referido.
