A chegada ao porto de Vilanova de Arousa dunha narcolancha pintada de branco nas mesmas narices das autoridades policiais na mañá do 28 de agosto de 2020 só podía indicar unha cousa: completara o seu traballo e a súa perda formaba parte dos plans. Esa é a principal hipótese que manexan os investigadores da Unidade Orgánica de Policía Xudicial da Garda Civil de Pontevedra, tal e como recollen os informes que subscribiron sobre o asunto e que obran en mans do Xulgado de Primeira Instancia e Instrución 1 de Vilagarcía de Arousa, competente sobre o feitos obxecto de investigación. Con todo, nin sequera a presenza de trazas de cocaína no interior do narcobuque (achado inequívoco mediante o traballo dos guías caninos e os seus cans adestrados tras a incautación da lancha) serviu para que o único detido polos feitos permanecese en prisión. Ao contrario. A Sección Cuarta da Audiencia Provincial de Pontevedra atendeu as súplicas da súa representación legal, póndoo en liberdade coa única premisa de comparecer cada quince días en sede xudicial.
Así, e aínda que o investigado foi capturado nas patacas mentres pretendía levar a terra a embarcación, o tribunal entende que o delito de contrabando (o único que pode atribuírselle pola tenencia da citada lancha) non contempla penas suficientes para continuar no cárcere, onde permaneceu de forma preventiva durante as primeiras semanas da investigación.
Por outra banda, froito do traballo policial do Instituto Armado sóubose que polo menos dúas persoas máis que non puideron ser identificadas viaxaron aquela noite na mesma embarcación, o que supón un indicio máis de que non saíra en plena madrugada a dar un paseo, senón, moi posiblemente, a recoller unha importante partida de droga en altamar e introducila en terra.
A presenza da narcolancha nun lugar no que con toda probabilidade ía ser detectada (a zona pola que pretendía entrar está á vista de calquera, incluso desde os propios edificios de Vilanova), fai pensar aos especialistas antidroga que se tratou dunha entrega cuxos efectos económicos estarían previstos, logo de introducir un alixo dun valor multimillonario. O valor da embarcación superaría os 100.000 euros, unha cantidade insignificante se finalmente puido entregar miles de quilos de cocaína.
