Un acusado de meter a man na caixa dun cámping di que el poñía diñeiro

A Sección Cuarta da Audiencia Provincial de Pontevedra acolleu este martes o primeiro xuízo público tras o parón estival. No banco dos acusados sentaba Óscar L.S., empresario de Vilanova de Arousa que se enfrontaba a penas de cárcere que sumarían sete anos se resultase condenado nos termos sinalados inicialmente pola Fiscalía Provincial, polos delitos de apropiación indebida, estafa e administración desleal.

O procesado negou os feitos que se lle atribuíron, indicando que foi el quen inxectou unha importante suma de diñeiro no cámping O Terrón, que pasou a rexentar xunto ao seu sobriño despois de que a súa irmá e o seu cuñado así o decidisen. Esa é a súa versión, na que sinalou que achegou unha importante cantidade para reformar un establecemento de lecer e esparexemento que "estaba obsoleto".

"O cámping non xeraba facturación, máis ben débedas", dixo o empresario, que engadiu que "eu traballaba pero, ao ser da familia, non cobraba", engadindo que estipulara porse un soldo anual de entre 35.000 e 40.000 euros para, segundo dixo, "non perder diñeiro respecto do meu anterior traballo".

O procesado recoñeceu que se puxo á fronte da metade do cámping en 2015 e que nesa época a entidade recibiu unha subvención por parte do Igape para efectuar unhas melloras. Con todo, e dado que a empresa non era viable, a entidade pública decidiu retirar os fondos, polo que as obras detivéronse e a el fóronlle devoltos uns 50.000 euros. "Entregueillos ao meu cuñado, que era o que levaba a parte económica do cámping". O aludido non pode contestar a iso, pois faleceu tempo despois vítima dun fatal accidente.

A vista oral estendeuse durante toda a mañá, pois decenas de testemuñas estaban presentes no Pazo de Xustiza para comparecer. O motivo é que a acusación cre que Óscar fixo súas diversas cantidades de diñeiro que cobrou en man e que non lle correspondían. O xuízo segue este xoves.