domingo. 07.03.2021 |
El tiempo
domingo. 07.03.2021
El tiempo

Adif estuda a creación de 24 'ferrolineiras' nas estacións de tren da provincia

2020110912222394989
Aparcadoiro da estación de Adif de Pontevedra. BEATRIZ CÍSCAR
O Administrador de Infraestruturas Ferroviarias abre a porta á explotación de 55 puntos de recarga eléctrica en Galicia

O mercado dos coches eléctricos conta cun novo aliado. O Administrador de Infraestruturas Ferroviarias (Adif) estuda a creación dunha rede de ferrolineiras de carga rápida por todo o país que inclúe a implantación dun total de 55 puntos de recarga nas estacións de tren de Galicia, 24 delas na provincia de Pontevedra.

Esta iniciativa é o resultado dun proxecto de I+D+i que asina o ente público e que se basea na sustentabilidade e a eficiencia enerxética, xa que aproveita a enerxía de freado dos trens para cargar os coches eléctricos, e que busca, ademais, impulsar o uso do vehículo eléctrico fóra das áreas metropolitanas.

O proxecto articularase en dúas fases. Primeiro, Adif estudará as solicitudes de análises de viabilidade técnica para a súa instalación nas distintas estacións de tren de vías electrificadas da rede nacional e posteriormente levará a cabo a licitación do arrendamento de espazos para instalar estes puntos de recarga eléctrica.

Chama a atención que na actualidade, España só conta con 5.200 puntos de recarga, (datos de 2018) e dispón de tan só 4,9 instalacións cada 100 quilómetros de estrada, fronte aos 28,3 puntos de recarga de media que contabiliza a Unión Europea. Ademais, dáse a circunstancia de que hoxe en día o 40% das electrolineras que se distribúen por todo o país concéntranse en tan só catro provincias, pouco máis dun terzo sitúanse en zonas interurbanas e apenas o 5% son de carga rápida.

A cidade do Lérez podería contar en 2022 con polo menos tres puntos de recarga nas súas estacións de tren

Con esta iniciativa, Adif e Adif AV buscan contribuír a paliar un dos grandes problemas aos que se enfronta a carga de vehículo eléctrico, apoiándose para iso na compra de enerxía verde certificada, unha rede de máis de 9.700 quilómetros de liñas electrificadas e a propia rede de estacións de viaxeiros.

Tal e como explica o ente público, as empresas adxudicatarias destes puntos de recarga poderán explotar as súas electrolineiras durante once anos prorrogables por cinco anos e medio máis, tendo en conta que se prevé un período de ao redor dun ano para acometer as obras de adecuación de espazos e instalacións.

As ferrolineiras, marca rexistrada polo Adif, estarán situadas nas inmediacións das estacións de tren, así como nos aparcadoiros. Deberán contar polo menos con dous conectores, de modo que se poida garantir a recarga rápida de dous vehículos eléctricos de xeito simultáneo.

GALICIA. Así, este proxecto abre a porta á posta en marcha de puntos de recarga eléctrica nun total de 45 estacións de Adif de liñas electrificadas en Galicia, das que 19 están situadas na provincia de Pontevedra. Trátase das estacións de Vigo-Guixar, Redondela, O Porriño, Filgueira, Frieira, Guillarei, Arbo, Arcade, As Neves, Caldelas, Catoira, Cesantes, Pontecesures, Pontevedra Universidade, Portela, Pousa-Crecente, Redondela AV, Salvaterra e Sela.

A estas hai que sumar oito estacións máis correspondentes a Adif Alta Velocidade de liñas electrificadas de Galicia, das que tres se sitúan tamén na provincia. Estas son a estación de Pontevedra, Vigo Urzáiz e Vilagarcía.

Tamén se enmarcan neste proxecto dúas estacións de Adif con xestor de aparcadoiro en Galicia, unha delas situada en Vigo, e unha máis correspondente á estación de Adif-AV con xestor de aparcadoiro na cidade de Pontevedra. Así, a cidade do Lérez podería contar en 2022 con polo menos tres puntos de recarga nas súas estacións de tren.

O sistema aproveita a enerxía de freado dos trens para cargar os coches eléctricos
O sistema de funcionamento das ferrolineiras consiste en aproveitar a enerxía eléctrica procedente das subestacións eléctricas que alimentan a catenaria, almacenar a enerxía limpa xerada mediante a aplicación do freado rexenerativo dos trens, e sumala á enerxía fotovoltaica recollida nas marquesiñas dos aparcadoiros dalgunhas estacións, dotadas de paneis fotovoltaicos. As posibilidades de despregamento son enormes: hai máis de 1.500 localizacións posibles noutras tantas dependencias de Adif, tal e como explican desde o ente que dirixe Isabel Pardo de Vera. 

Adif ofrecerá a potenciais promotores deste tipo de dispositivos a posibilidade de instalalos en 400 estacións de tren de vías electrificadas e principalmente de percorridos interurbanos. Este modelo de desenvolvemento pretende potenciar a intermodalidade entre distintos modos de transporte, ao incorporar o vehículo eléctrico ao espazo de influencia das instalacións ferroviarias. 

A implantación de puntos de recarga de vehículos eléctricos enmárcase no Plan de Loita contra o Cambio Climático de Adif e Adif AV 2018-2030.

Adif estuda a creación de 24 'ferrolineiras' nas estacións de tren...
comentarios
ç