A Asociación Española Contra o Cancro (AECC) quere trasladar a súa sede provincial -situada na rúa Augusto González Besada, 9 -entreplanta- a un local máis amplo situado en Eduardo Pondal, o que no seu día acolleu ás oficinas do Instituto Nacional de Emprego (Inem). A mudanza só está pendente da preceptiva autorización do Consello Executivo Nacional da institución benéfica.
A arquitecta que se encarga da redacción e posta en marcha dos proxectos de obras que realiza a AECC xa inspeccionou o local das antigas oficinas do Inem para analizar as reformas que sería preciso efectuar no caso de que se concrete a operación de arrendamento co contructor Arturo Ramíres
O local que no seu día albergou as oficinas do paro conta cunha superficie de máis de mil metros cadrados. A AECC só utilizaría a metade, 500 metros cadrados porque o Consello Executivo Nacional non lle autoriza dispor de máis espazo, polo que en caso de concretarse a operación do aluguer o propietario efectuaría unha división mediante a instalación dun tabique.
As novas instalacións teñen unha superficie de 500 metros cadrados que facilitarían o desenvolvemento das actividades
"A AECC de Pontevedra necesita desa superficie porque conta cun persoal de 19 traballadores, un persoal no que figuran oito psicólogas", sinala María José Crespo Amigo, expresidenta provincial da AECC e que na actualidade é membro do Consello Executivo Nacional da entidade, que expuxo a proposta na reunión que este organismo celebrou en Madrid o pasado venres.
Crespo ten a esperanza de que esa actuación salga adiante porque, argumenta, "todas as sedes provinciais da AECC están a trasladarse a plantas baixas de fácil accesibilidade". A de Augusto González Besada está situada nunha entreplanta á que van persoas en cadeiras de rodas polo que, subliña a expresidenta provincial, "é necesario adaptar as instalacións aos novos tempos, facilitando a mobilidade".
"Ademais o local de Eduardo Pondal dános unha maior visibilidade porque por diante da porta pasa moita xente", sinala Crespo en referencia ao fluxo de persoas que transitan por este viario, que comunica as estacións do autobús e do ferrocarril co centro da cidade.
"Outras sedes da AECC que cambiaron de localización, por exemplo Huesca e Valladolid, que estaban en entreplantas ou en pisos e pasáronse a planta baixa, viron como aumentaba o número de pacientes, que é o que nos interesa porque a nosa obrigación é atender ao maior número posible de pacientes e familiares. Porque non se trata de ter diñeiro no banco senón de usalo e destinalo a axudar ás persoas que o necesitan", comenta María José Crespo.
A AECC provincial concentraría nas novas instalacións de Eduardo Pondal a totalidade dos servizos que presta, incluídos os talleres e os cursos de deshabituación tabáquica que está a impartir no local que a Xunta cedeu a esta entidade no edificio administrativo de Benito Corbal.
"Na sede de Augusto González Besada se organizamos unha actividade temos que deixar de realizar outra", subliña Crespo. Ademais, anuncia que en caso de contar co visto e prace do Consello Nacional as obras de reforma do local de Eduardo Pondal comezarían as obras de acondicionamento do local "canto antes".
INEM. O Inem comezou a operar o pasado 26 de novembro na súa nova sede, situada no edificio administrativo de Benito Corbal. Co traslado ás remocicadas instalacións -que no seu día acolleron distintas delegacións provinciais da Xunta de Galicia (na actualidade agrupadas no edificio administrativo de Campolongo)-, o local de Eduardo Pondal quedou sen actividade.
A mudanza do Inem ao edificio de Benito Corbal permite ao Executivo autonómico aforrarse o aluguer das dúas oficinas de Eduardo Pondal, polas que pagaba dúas rendas valoradas en 150.000 euros ao ano.
