O ritmo de crecemento da pandemia parece ser menor. A Área Sanitaria de Pontevedra-O Salnés informou este luns da existencia de 667 casos activos, só oito máis respecto ao anterior parte, aínda que os antecedentes obrigan a ser precavidos, máis aínda cando os datos se proporcionan logo dun fin de semana. Entre os diagnósticos máis recentes atópanse un traballador do Hospital Provincial e un menor residente no Centro Príncipe Felipe.
No primeiro caso as autoridades sanitarias acordaron poñer en corentena o propio empregado e a cinco compañeiros da última quenda no que estivo a traballar (correspondente ao pasado sábado), aínda que para algúns sanitarios a medida pode ser insuficiente. O traballador compartiu espazo con outros "compañeiros" en días "previos" e "cabía a posibilidade de poñer polo menos en illamento a planta na que traballaba", indican.
No caso do Príncipe Felipe, o diagnóstico (realizado o fin de semana) motivou o illamento de seis menores e sete traballadores do centro, considerados "contactos directos". Todos deron negativo nas probas, aínda que cumprirán a corentena tal e como dita o protocolo vixente.
A metade dos casos activos da área sanitaria corresponden ao municipio de Pontevedra
Por concellos, a metade dos activos (338) residen no municipio de Pontevedra, onde o aumento da incidencia tamén parece haberse relaxado. Polo momento, o programa de cribado a profesionais da hostalería (iniciado o pasado fin se semana nunha caseta próxima ao Provincial) non engordou a lista de casos, aínda que falta por ver que ocorrerá nos próximos días.
De feito, o alcalde de Poio, Nito Sobral, anunciou este luns que o Concello facilitará á Xunta as listaxes do persoal do Servizo de Axuda non Fogar (SAF), Policía Local e taxistas, outros da colectivos da área que serán cribados. De momento, Poio conta, segundo os datos deste luns, con 56 casos activos, un 60% máis dos notificados o xoves.
Marín pasou dos 59 aos 51 casos, Vilaboa permanece estable con 21 contaxiados, e Lalín comunicou este luns que os edís Begoña Branco e Bernardino Seijas xa foron dados de alta.
Os alcaldes destes concellos, con restricións especiais por mor da situación epidemiolóxica, reúnense este martes co conselleiro de Sanidade e o xerente do Área Sanitaria para abordar o resultado das limitacións vixentes e estudar a posible aplicación de novas medidas.
