Sábado. 17.11.2018 |
El tiempo
Sábado. 17.11.2018
El tiempo

Albia proxecta construír un tanatorio á beira da rotonda de acceso a Montecelo

Zona na que o grupo Albia prevé levantar o seu primeiro tanatorio en Pontevedra. DAVID FREIRE
Zona na que o grupo Albia prevé levantar o seu primeiro tanatorio en Pontevedra. DAVID FREIRE

O edificio terá catro salas velatorias, capela e outros servizos e crearase un parking público con 44 prazas 

O sector funerario móvese en Pontevedra. O grupo Albia quere abrir o terceiro tanatorio do municipio. E pretende facelo nunha parcela próxima á rotonda de acceso ao Hospital Montecelo, xusto enfronte á nave industrial de Dielectro.

A compañía solicitou xa a correspondente licenza ante o Concello, que estuda se o proxecto está en regra e cumpre coas normativas urbanísticas. O edificio proxectado por Albia contaría con baixo e planta e con catro salas velatorias. Ademais disporía de servizos de capela, oficina, baños e outras dependencias internas.

O plan contaría ademais coa creación dun aparcadoiro público con 44 prazas, que se situaría no mesmo solar da subida a Montecelo.

O grupo funerario, vinculado á aseguradora Santalucía, conta con 22 tanatorios en Galicia. Ningún deles en Pontevedra. Os máis próximos á capital provincial sitúanse en Marín, Bueu ou Sanxenxo.

A empresa tiña previsto levantar un crematorio na zona ata que o Concello puxo límites ao sector cunha polémica normativa

No caso de que a obra salga adiante, Albia daría un importante golpe de man a algúns dos seus competidores. Entre eles estaría a sociedade As Correntes, formada en 2012 pola funerarias Alianza e Barros e Pompas Fúnebres para construír un tanatorio na antiga leira do Teucro, en Arcebispo Malvar.

Aquela iniciativa empresarial acumula anos de atrasos debido a cuestións relacionadas coa burocracia e coa aparición de restos arqueolóxicos de importante valor na zona. Polo momento non se produciron avances significativos neste proxecto, que o ano pasado tivo que ser sometida a un novo exame por parte da Dirección Xeral do Patrimonio Cultural, un organismo dependente da Xunta.

O departamento autonómico debía resolver que se fai cos restos arqueolóxicos achados no solar que ambas as empresas compraron no seu día ao Colexio de Arquitectos de Galicia por 600.000 euros. Os técnicos do Concello recomendaban a conservación dun tramo da muralla medieval (século XVI) que apareceu durante unhas escavacións realizadas na zona en 2015. A estrutura ten case 35 metros de longo, 2,39 de ancho e unha altura de 1,80 metros. Crese que este xacemento é a continuación dos restos descubertos no seu día na Praza de Valentín García Escudeiro, os mesmos que volveron ser enterrados de forma parcial tras fracasar un proxecto de musealización por falta de fondos.

Os achados dos restos inéditos da antiga fortificación de Pontevedra revelou, ademais, a existencia de polo menos un baluarte no solar de Arcebispo Malvar. Na zona tamén se atoparon moedas españolas do século XII, balas de chumbo, fragmentos de pratos sevillanos, fichas de xogo ou pipas de caolín. Segundo recolle a normativa en vigor, estes restos terían que ser trasladados ao Museo Provincial.

A resolución de Patrimonio sobre o descubrimento da antiga leira do Teucro expón tres posibles alternativas: integrar a muralla no solar e crear un centro de interpretación, tapar os restos ou a posta en valor destes vestixios, deixándoos á vista do público. A cuarta vía, que sería independente ao que reclame o organismo galego, pasaría pola desistencia do proxecto tanatorio por parte das Correntes. Neste caso, a parcela podería porse á venda e destinarse a outros usos.

TRIBUNAIS. Cabe recordar que nesta zona proxectouse no seu día un crematorio. Pero a normativa elaborada polo Concello de Pontevedra para pór límite a este tipo de instalacións frustó a idea empresarial, que contaba cunha forte contestación veciñal.

Albia tamén tiña previsto levantar un forno crematorio na subida a Montecelo, xusto onde agora pretende impulsar un tanatorio.

En Pontevedra existían ata cinco iniciativas deste tipo que se viron frustradas polo regulamento municipal. Os crematorios íanse a edificar en Arcebispo Malvar, na rotonda de acceso ao Hospital, xunto ao tanatorio de San Amaro e fronte ao cemiterio deste último lugar.

Logo dun polémico percorrido administrativo, a normativa de crematorios foi anulada polo Tribunal Superior de Xustiza de Galicia (TSXG) por carecer do trámite de avaliación ambiental. A Xunta eximiu ao Concello deste trámite, que agora abre a porta a que se reactiven distintos proxectos que xa se daban por descartados.

O Goberno local recorreu o fallo, que se produciu como consecuencia da denuncia presentada pola plataforma "Non crematorios Pontevedra Leste", na que estaban representados veciños do barrio da Parda. Este colectivo opúñase á construción dunha instalación para incinerar cadáveres en San Amaro, concretamente á de Funespaña, que mantén a súa promoción no caixón. De feito, se a compañía tivese intención de retomar o proxecto podería facelo porque era o único que cumpría cos requisitos fixados por Pontevedra para estas construcións.

Albia proxecta construír un tanatorio á beira da rotonda de acceso...
Comentarios