O alcalde de Pontevedra, Miguel Anxo Fernández Lores (BNG), confía en que a resolución da Audiencia Nacional aos recursos presentados contra a prórroga concedida a Ence sexan "favorables" aos intereses do Concello.
O goberno municipal presentou un dos tres recursos contra a decisión do Goberno de Mariano Rajoy de ampliar o permiso á pasteira para ocupar terreos de Costas na ría de Pontevedra ata o ano 2073.
Fernández Lores considera que "hai moitas razóns" para pensar que a sentenza da Audiencia Nacional apoiará o posicionamento do concello pontevedrés, pero avanzou que en caso contrario manterán a súa guerra xudicial.
"Temos razón e dereito, como tiveron outras cidades de todo o mundo, a deslocalizar empresas e mellorar a calidade de vida dos nosos cidadáns", sinalou o alcalde do BNG, que reitera que esta fábrica "nunca debeu estar" en plena ría de Pontevedra.
Tras reiterar que usarán "todas as vías posibles" para recuperar a ría ambientalmente, o alcalde de Pontevedra insistiu que non van deixar de seguir loitando, "independentemente do posicionamento desta sentenza ou doutras".
Lores considera que, logo de 60 anos de actividade, "xa vai sendo hora de que se busquen alternativas" para situar este complexo industrial e engadiu que "o que non é asumible é saltarse a lexislación vixente" e permanecer en Pontevedra máis al de 2033.ó
O alcalde matizou que, no caso de que exista unha "clara" vontade de traslado por parte da empresa, "non nos parece mal" que se dea un "período transitorio". Ante este conflito, o alcalde de Pontevedra tamén censurou a actitude do PP porque, segundo dixo, "non fixo absolutamente nada" por buscar alternativas ao actual emprazamento de Ence, a pesar de ter "responsabilidade directa" na súa situación.
