A volta á actividade da construción pon en marcha, de novo, obras municipais que estiveran paradas durante as dúas últimas semanas. Con todo, o alcalde quere reunirse cos técnicos encargados de cada contrato para coñecer en que condicións volven ao traballo os operarios que traballan nelas. A obra pública reactívase, pero o Concello quere analizar cada unha das obras para comprobar cales son as condicións de seguridade para os traballadores.
Explicouno este luns Eva Villaverde tras a Xunta de Goberno, nunha xornada que para a construción foi día non laborable por convenio. Deste xeito, os traballadores incorporaranse hoxe aos seus postos nas diferentes obras públicas en marcha no Concello. Con todo, o Goberno local non detallou en que condicións producirase esta reincorporación á espera de contar coa información que acheguen os técnicos na citada reunión que manterán co alcalde, Miguel Anxo Fernández Lores.
Actualmente, atópase en marcha a humanización do ponte do Burgo e a súa contorna, as melloras no campo de fútbol de Ponche Sampaio e o acondicionamento das novas oficinas municipais no edificio Ferreiros. Estas tres obras,e outras de menor envergadura, foron paralizadas coa suspensión das actividades non esenciais.
Deste xeito, a ponte do Burgo tiña pendente colocar a nova iluminación para terminar os traballos. As empresas concesionarias son EC Casas, Imesapi e Setga. Tiñan que ter o traballo terminado en maio, pero os prazos dilataranse, non só polo parón dos últimos 15 días, senón tamén polas novas medidas de seguridade fronte aos contagios, que retardan unhas obras que teñen un custo total de máis de dous millóns de euros.
O edificio municipal da rúa Ferreiros, que acollerá aos traballadores dos servizos tributarios e de urbanismo, debería estar reformado en febreiro. A obra, cun custo por encima do millón de euros, sufrirá tamén atrasos na súa finalización.
A nivel municipal, recupéranse tamén as intervencións no Pavillón Municipal de Deportes, en Cacheiro (Ponche Sampaio), Martín Raxo (Lourizán), as melloras no firme no Rial (Lourizán), o parque forestal da Tomba (Campañó) e a rehabilitación de entradas a centros sociais.
Por outra banda, tamén quedaron en suspensión as obras de strong <>a estación intermodal de Pontevedra, executadas pola Xunta de Galicia que cofinancia nun 25% o Concello. Recuperarán este martes a actividade.
A Boa Vila conta ademais cunha carteira de obras pendentes de porse en marcha nos próximos meses, tal e como anunciou a portavoz do Goberno, Anabel Gulías, hai unhas semanas. As obras formaban xa parte dos plans do Goberno local pero, en palabras da propia Gulías, servirán para "reactivar" a economía e inxectar liquidez tras a crise provocada pola pandemia. Neste sentido, trátase dunha vintena de obras por valor de 11,3 millóns de euros. Estas levaranse a cabo en zonas como ra úa de Loureiro Crespo, que será humanizada xunto ao barrio do Castañal e suporán ás arcas públicas un desembolso de 2,1 millóns de euros. Por outra banda, construirase un novo viario a Monte Porreiro (un millón de euros) ou se mellorará o parque forestal da Fracha (453.021 euros), entre outros proxectos na cidade e as parroquias.
