A Asociación de Amigas e Amigos do Museo de Pontevedra (Amupo) presentou onte oficialmente ante a Xunta de Galicia a solicitude de declaración de Ben de Interese Cultural (BIC) para o Pazo de Lourizán. «Consideramos urxente que se tramite esta petición porque, canto máis tempo pase, a situación de abandono e deterioro que sofre o inmoble e a súa contorna vai ir a peor», indicou o presidente da asociación, Ernesto Vázquez-Rey, ao tempo que lembrou que, entre outras cousas, a galería norte xa está apuntalada. "Tanto o Concello como a Deputación, actual propietaria, teñen a obriga legal de conservar o Pazo como os seus elementos. É evidente que non o fan. Realizáronse unha serie de intervencións nefastas ou contrarias á súa protección como foi o uso dun cemento de pésima calidade nas cubertas, que rematou por abrir a galería e encher a cornixa de estalactitas".
A solicitude de Amupo, que agora valorará a Dirección Xeral de Patrimonio, apóiase nun estudo previo da historia e do estado deste espazo realizado pola propia asociación e conta co apoio formal da Real Academia Galega de Belas Artes (RAGBA), un dos organismos externos que a Xunta pode consultar para levar a cabo estas declaracións. Tamén o son o Consello da Cultura Galega, o CSIC, o Instituto de Estudios Gallegos Padre Sarmiento e as Universidades. A petición de Amupo inclúe, non só o Pazo, senón tamén todo o espazo que o rodea e os elementos que contén, dende as fontes, o invernadoiro, as ruínas do serradoiro, as grutas e o xardín, entre outras cousas. "En concreto, pedimos a declaración de BIC para as 52 hectáreas da finca".
ESTATUA DE COLÓN. Entre as aspiracións da asociación está a de restaurar o Pazo de Lourizán e a de devolverlle o seu contido orixinal. "Entre outras cousas, por exemplo, a estatua de Colón que hoxe está nos xardíns de Vicenti. Debería volver ao seu lugar orixinal e, se é necesario, colocar neste outro espazo unha réplica".
Vázquez-Rey lembrou onte a importancia que tería "para este espazo e para Pontevedra" acadar a consideración de BIC. "Estariamos a falar de protexer oficialmente un pulmón entre Marín e Pontevedra, un lugar situado estratexicamente entre os dous concellos. Ademais, a declaración limitaría a actividade que Ence realiza agora mesmo enfronte do Pazo e aseguraría que non seguise ocupando espazo para as súas actividades".
Amupo considera que a declaración de BIC debe chegar. "O Pazo de Lourizán axústase tanto á convención da ONU ao respecto como as leis estatais e autonómicas".