Os analistas financeiros especularon esta semana coa posibilidade dunha demora de dous anos na resolución que o Tribunal Supremo deberá adoptar sobre os recursos presentados estes días por Ence contra a decisión da Audiencia Nacional de anular a prórroga aprobada para garantir a súa permanencia na ría de Pontevedra ata 2073.
Os atrasos administrativos propios do Alto Tribunal, os derivados da pandemia e os problemas que carrexa a falta de renovación dos maxistrados que compoñen o Supremo explicarían a previsible tardanza na resolución deste asunto ata 2023. Esas son tamén as previsións manexadas pola empresa, que segue pendente doutra resolución na Audiencia Nacional, a que terá que adoptar respecto a un terceiro recurso, interposto no seu día pola APDR á marxe dos xa fallados do Concello de Pontevedra e a organización ecoloxista Greenpeace.
No caso de que o Tribunal Supremo non admita a trámite ningún recurso, a anulación da prórroga podería considerarse firme e Ence tería que pechar Lourizán. O presidente da compañía, Ignacio de Colmenares, reiterou esta semana aos investidores que as únicas alternativas que manexa a empresa son continuar en Lourizán ou pechar a planta pontevedresa e trasladar a produción ao complexo fabril de Ence en Navia (Asturias).
Ence leva varios semestres desviando investimentos cara a súa planta de Navia, que agora achega un 42% dos seus ingresos
A contabilidade do segundo trimestre do ano revelou unha provisión de fondos de Ence por valor de 148 millóns de euros ante a posible deterioración de activos como consecuencia dun peche así. Ademais, provéronse outros 42 millóns polos posibles gastos do desmantelamento de Lourizán e 6 millóns máis para cancelacións de contratos en caso de clausurar esta planta.
En paralelo, como previsión deste peche, a compañía ten xa deseñada unha recondución dos seus investimentos cara a Navia mediante unha reestruturación do seu Plan Estratéxico. En ningún momento se contempla relocalizar a produción actual de Pontevedra noutro lugar de Galicia.
En realidade, Ence leva varios semestres desviando investimentos cara á súa planta de Navia, que agora mesmo achega o 42% dos ingresos totais da firma, fronte ao 33% que supón a fábrica galega.
As contas da pasteira neste segundo trimestre de 2021 son positivas, cun beneficio neto de 12 millóns de euros, a partir das perdas de 13 millóns que se rexistraron un ano antes. Os ingresos creceron un 15,1% neste mesmo período e o Ebitda aumentou un 122,5%.
Segundo os analistas, Ence xa ten descontado no seu balance o efecto da sentenza da Audiencia Nacional e a final de ano terá provisto tamén nas súas contas o eventual peche en Pontevedra.