Como todo na vida, sempre hai un lado descoñecido que, non por estar oculto, é menos interesante e, cando menos, útil. é o caso dos servizos humanitarios da Policía Local, que veñen pór de manifesto a complexidade de funcións que desenvolve este Corpo policial, caracterizado pola súa proximidade á cidadanía. Estas actuacións constitúen a cara máis descoñecida, pero non menos importante, do amplo abanico de funcións que leva a cabo a Policía Local.
O exemplo máis recente de que os funcionarios policiais non só velan e garanten o cumprimento das ordenanzas municipais, senón que sempre están aí para atender calquera incidencia no menor tempo posible é a actuación que desenvolveron o pasado día 6, sábado, que tivo como protagonista a unha muller de 87 anos e que tivo un desenlace feliz.
Os veciños da octoxenaria, que vive soa nun piso da rúa Rodríguez Seoane, botárona en falta ese día. Chamoulles a atención non vela levantada esa mañá para ir ao salón de peiteado, á que adoitaba acudir cada sábado, así que ao redor das 12.30 horas decidiron chamar á porta da vivenda sen obter resposta, a pesar da insistencia. Tampouco lles colleu o teléfono.
Este caso forma parte do 80 por cento, aproximadamente, das actuacións da Policía Local en Pontevedra enmarcadas no apartado de servizos "humanitarios"
Foi entón cando saltou a alarma e, temendo o peor, telefonaron á Policía Local para informarlle de que lles preocupaba non ver á anciá saír do seu domicilio e que tampouco respondía os golpes que deran na porta.
Varios axentes desprazáronse ata o lugar para tratar de localizar á muller. Preguntaron no salón de peiteado á que adoitaba acudir todos os sábados, na que constataron que non a visitou, unha circunstancia que tamén causara estrañeza na propietaria do negocio.
Tras efectuar estas indagacións, os funcionarios policiais foron ao piso da octoxenaria, que non respondeu á chamada que lle efectuaron desde o exterior. Ao non obter resposta, os axentes puxéronse en contacto telefónico cun fillo da muller que reside fóra de Pontevedra para pedir a súa autorización para forzar a porta do domicilio.
Co preceptivo permiso, foi necesaria a intervención dos Bombeiros para acceder ao interior do inmoble, o lugar onde todos os indicios que recolleu a Policía Local apuntaban a que podería estar a anciá á que estaban a buscar.
Unha vez dentro da vivenda, confirmáronse as sospeitas. A muller atopábase tombada en chan da habitación, xunto á cama, sen poder levantarse polos seus propios medios. Ese foi o motivo polo que non atendera ao requirimento dos veciños nin da Policía Local.
A intervención finalizou dun modo feliz, coa anciá traslada en ambulancia ao Hospital Montecelo, onde se está recuperando de forma satisfactoria.
"Evitouse a traxedia grazas a que en Pontevedra todos preocupámonos de todos. Estamos pendentes do que lle poida ocorrer a calquera persoa, en especial á xente maior que vive soa", destaca Manuel Omil, portavoz da Policía municipal. Ademais, recorda que este tipo de casos "adoitan ser bastante frecuentes. De feito -engade-, o Concello conta cun servizo formado por unha enfermeira ou unha auxiliar que a calquera hora acoden ao domicilio de persoas que sufriron caídas que, na súa maioría, non son motivo de traslado a un centro sanitario".
Este caso forma parte do 80 por cento, aproximadamente, das actuacións da Policía Local en Pontevedra enmarcadas no apartado de servizos "humanitarios". Os axentes, que adoitan ser os primeiros en chegar ao lugar do que procede unha chamada de auxilio, prestan a atención inicial á vez que alertan do que sucede ao resto de servizos de urxencias.
