A área sanitaria de Pontevedra-O Salnés sumou en 24 horas dous novos positivos en coronavirus, cos que se elevan a 20 os casos activos. O balance divulgado este martes polo Sergas sitúa así a área coa cifra máis elevada desde inicios de xuño.
Confirma, ademais, que un paciente continúa ingresado en planta no Complexo Hospitalario Universitario de Pontevedra, e que non hai ningún no Hospital do Salnés nin no QuirónSalud Pontevedra. Os outros 19 infectados están nos seus domicilios.
Desde o inicio do plan de continxencia ante a aparición do virus rexistráronse 912 pacientes curados na área sanitaria —cifra idéntica á deste luns— e faleceron nela 16 persoas.
GALICIA. Pontevedra contribúe así a que os casos activos de Covid-19 volvan subir na comunidade por quinto día consecutivo, xa que este martes hai dez máis que o luns. Son en total 242, segundo os datos facilitados pola Consellería de Sanidade.
O maior incremento prodúcese na área sanitaria da Coruña, onde hai cinco novos positivo e cóntanse un total de 63; mentres que na de Santiago hai catro novos positivos, ata os 20. En Vigo hai tres máis e o total de positivos sitúase en 47.
Mentres, descenden os casos activos na área sanitaria de Lugo, onde pasan de 89 a 85 —zona na que se inclúe o brote da Mariña—. A zona de Ferrol continúa como a única libre de Covid-19.
De acordo coa información da Consellería de Sanidade, do total de pacientes positivos, hai un na Uci e nove atópanse en unidades de hospitalización, dous menos que o luns. Unha destas altas correspóndese co xogador do Club de Fútbol Fuenlabrada que permanecía hospitalizado na Coruña desde o pasado venres.
Ata este martes, Galicia contabilizou 11.236 persoas curadas —oito máis que no parte anterior— e 619 falecementos, dos que 274 están relacionados con residencias de maiores. A cifra de mortes que deixa a pandemia na comunidade permanece sen variación desde o pasado 10 de xuño.