A Área Sanitaria de Pontevedra e O Salnés comezará a administrar este luns nos centros de saúde a terceira dose da covid entre os maiores de 80 anos, quen recibirán de forma simultánea a vacina contra a gripe.
A dirección da Área calcula que nos próximos días citarase a unha media de 1.000 pacientes ao día mediante unha mensaxe de texto que conterá a información sobre a data, a hora e o lugar ao que terán que dirixirse para ser inmunizados.
Segundo o Instituto Galego de Estatística, os 26 concellos da área sanitaria reúnen a 21.897 persoas con máis de 80 anos, aínda que non todas serán citadas, xa que os residentes en centros sociosanitarios xa recibiron a terceira dose
A previsión é continuar despois coas franxas de menor idade, para as que Sanidade contempla a posible reapertura dos vacunódromos o que en Pontevedra afectaría o Recinto Feiral e en Vilagarcía a Fexdega.
Doutra banda, tanto Montecelo como o Provincial continuarán esta semana como puntos de administración de segundas doses contra a covid, e ao mesmo tempo manterase o sistema de Autocita polas mañás, para maiores de 12 anos, na web do Sergas ou o teléfono 981 215 930.
CASOS ACTIVOS. A nivel epidemiolóxico, o coronavirus dá un respiro na área sanitaria de Pontevedra e O Salnés. Logo de cinco días consecutivos con aumento nos casos activos, o Sergas notificou este domingo que o total baixou ata os 49 pacientes, tres menos dos 52 do parte anterior.
Ademais, o ritmo de contaxio caeu nas últimas 24 horas. O Sergas comunicou un único caso novo, mentres que o sábado detectáronse cinco. Ademais, a presión hospitalaria mantense sen cambios, cunha persoa ingresada na Unidade de Coidados Intensivos (Uci) do Complexo Hospitalario Universitario de Pontevedra.
Desde o inicio da pandemia curáronse de covid 21.239 persoas diagnosticadas na área e faleceron 205.
