A Garda Civil, no marco da operación 'Mansalva', desarticulou unha organización criminal dedicada a introducir cocaína vía marítima que posteriormente distribuía a distintos lugares de España e Portugal. Na operación incautáronse 475 quilos de cocaína e hai un total de 14 persoas detidas: once en Pontevedra (no Salnés), dous en Valencia e unha no país luso.
Nos nove rexistros levados a cabo, o instituto armado interviu 12.000 euros en efectivo, doce teléfonos satelitales, catro vehículos con dobres fondos e un remolque dotado dun sofisticado sistema hidráulico de ocultación, no que a organización chegou a trasladar máis de 300 quilos de cocaína. Así mesmo, descubriuse unha plantación de marihuana con máis de mil plantas que pertencía á organización.
As investigacións iniciáronse o ano pasado, cando especialistas da Garda Civil na loita contra o crime organizado tiveron coñecemento da existencia dun grupo delituoso asentado no Salnés, integrado por persoas con antecedentes por narcotráfico.
En xullo de 2018, a investigación frustrou a entrega de máis de 300 quilos de cocaína que fora trasladada de Galicia a Valencia. Alí interveuse a droga nun garaxe da localidade valenciana de Quart de Poblet, cando estaba a ser custodiada por dous membros da rede, que foron detidos nese momento.
Posteriormente, os avances na investigación frustraron en Portugal outra entrega de 175 quilogramos de cocaína, que fora trasladada desde a provincia de Pontevedra. A Policía Judiciaria do Porto e a Garda Nacional Republicana incautou esta partida nas inmediacións da localidade lusa de Coimbra e detivo á persoa que transportaba a droga.
DE SUDAMÉRICA. A Garda Civil descubriu o curioso sistema utilizado pola organización, consistente nun remolque, aparentemente baleiro, pero dotado dun sofisticado sistema hidráulico que ocultaba un dobre fondo con capacidade para máis de 300 quilos.
Varios vehículos lanzadeira escoltaban a carga. A organización tiña moi avanzados os contactos e preparativos para a introdución dunha importante cantidade de cocaína que, vía marítima, chegaría a Galicia procedente de Sudámerica. A Garda Civil logrou abortar este envío ao deter a todos os seus membros.
Nun os rexistros practicados, concretamente no de Baión, as autoridades acharon unha plantación de marihuana, en pleno rendemento, con máis de mil plantas.
TECNOLOGÍA. Os detidos utilizaban medios técnicos avanzados para evitar ser detectados e investían importantes cantidades de diñeiro en tecnoloxía, para obter comunicacións seguras e detectar medios de investigación policiais.
A operación 'Mansalva' está dirixida polos Xulgados de Instrución número 1 e 3 de Quart de Poblet (Valencia), e contou coa coordinación das fiscalías antidroga de Valencia e Pontevedra. O operativo foi liderado polo Equipo Contra o Crime Organizado (ECO), con base en Pontevedra, da Unidade Central Operativa da Garda Civil, coa colaboración do ECO de Alacante, as Unidades Orgánicas de Policía Xudicial de Pontevedra e Cádiz, GRS número 7, Unidade de Seguridade Cidadá (USECIC), Servizo Cinológico e outros servizos de apoio da Comandancia da Garda Civil de Pontevedra.
