Así se recolle o lixo nos domicilios dos veciños positivos por coronavirus

Mono de traballo, máscara, luvas e un cubo móbil de 90 litros de capacidade. Francisco Diz leva desde o pasado mes de marzo coa mesma rutina de traballo. Este empregado de Ferrovial, a empresa concesionaria dos lixos en Pontevedra, é o encargado do servizo de recolleita porta a porta que o Concello puxo en marcha ao comezo da pandemia do coronavirus para facilitar a vida dos veciños confinados por dar positivo ou por convivir con infectados e, de paso, previr contaxios.

"O meu traballo é sempre o mesmo. Chego ó piso, timbro e ábrenme a porta", explica Diz, que recorda que os beneficiarios desta iniciativa deben cumprir cunha serie de requisitos para garantir a seguridade de todo o proceso. "O lixo ten que estar na porta antes de eu entrar. Unha vez que está fóra da porta recólloa e métoa no contedor. Se chego á vivenda e vexo que o lixo non está ben pechado ou está en malas condicións, non se recolle", engade.

A iniciativa segue o protocolo que o Goberno central puxo en marcha durante a primeira onda da covid-19. O lixo das vivendas con casos positivos por esta enfermidade ten que depositarse en tres bolsas distintas, atadas de forma independente e que non estean rotas para evitar hipotéticas fugas.

"Ten que ir todo hermético, ben cerradiño", destaca Diz, que asegura que estes residuos "non pasan polo camión". Trasládanse directamente a colectores específicos que logo se envían á planta que Sogama ten na localidade coruñesa de Cerceda. Alí son incinerados. "A xente cumpre bastante ben", apostila.

No servizo traballamos 24 horas ao día e durante os 365 días do ano. Non hai descanso, tampouco durante a pandemia

ANONIMATO. O servizo posto en marcha por Ferrovial (a antiga Cespa) notou unha importante baixada do número de fogares que solicitan a recollida de lixo porta a porta. O pico rexistrouse ao comezo da pandemia, no que se contabilizaron ata 23 domicilios adheridos.

"Hai moitos máis casos que casas ás que vou recoller o lixo. Hai días que sobe o número de vivendas e outros días que baixa", indica o encargado do programa, que apunta dous posibles motivos polos que algúns cidadáns non activan este plan municipal: "Ou non se apuntan por descoñecemento ou polo que dirán os veciños". 

O programa municipal garante o anonimato dos usuarios en todo momento. Para anotarse, os interesados poden chamar ao teléfono da Policía Local (986 833 080), que se encarga de facilitar a dirección postal dos solicitantes á firma concesionaria. "Unha vez que se pasan os datos, o encargado envíame a dirección a min a través do WhatsApp", apunta Diz, que leva cinco anos traballando para Ferrovial.

O servizo porta a porta comezou con dous operarios, pero agora só queda el, debido a que a carga de traballo se reduciu. "Dende marzo non tiven nin o máis mínimo problema. De feito, creo que é máis perigoso andar pola rúa que facer esta recollida. Tomando as precaucións que hai que tomar, claro", aclara.

A xente agradece moito que se puxo en marcha este servizo, que se caracteriza pola súa axilidade. É unha boa iniciativa municipal

"AXILIDADE". A crise sanitaria obrigou a investir algunhas das prioridades do servizo de lixos. Ao empezar a pandemia, a concesionaria empregou ao seu persoal, formado por 125 persoas, a realizar tarefas como desinfección de espazos públicos e de equipamentos utilizados pola cidadanía, como os composteros comunitarios. Entón, máis de 50 operarios traballaban en quendas de mañá, tarde e noite para higienizar distintas áreas da cidade para evitar hipotéticos contaxios de covid.

"No servizo traballamos 24 horas ao día durante os 365 días do ano. Non hai descanso, tampouco durante a pandemia", apunta Afonso Silveira encargado xeral de Ferrovial, que fala así da recolleita porta a porta: "A xente agradece moito que se puxo en marcha este servizo, que se caracteriza pola súa axilidade. É unha boa iniciativa municipal".