A Asociación Española contra o Cancro (AECC) de Pontevedra presentou este martes o proxecto da investigadora viguesa, Mónica Martínez, que recibiu a única bolsa AECC adxudicada en Galicia hai un ano. Con esta presentación, quixeron resaltar a importancia de seguir financiando proxectos de investigación para combater o cancro.
Mónica Martínez xa acumulaba máis de 6 anos de experiencia postdoctoral no Instituto de Investigación Hospital 12 de Octubre de Madrid e pasara por prestixiosos centros de investigación no estranxeiro como no Cancer Institute da University College de Londres, a Universite Laval en Quebec ou o I3S-Ipatimup da cidade portuguesa do Porto.
Grazas a esta bolsa, a doutora Martínez, uniuse ao grupo "Mobile genomics and disease" do Cinbio, liderado polo experto en xenómica José Tubío, para estudar como determinadas secuencias de ADN mobilízanse e acaban provocando o desenvolvemento de distintos tipos de cancro.
O obxectivo principal deste proxecto é explorar por primeira vez o impacto funcional de elementos móbiles no xenoma tumoral. Se se demostra que estes elementos móbiles posúen un papel como potenciais oncoxenes, os resultados do presente proxecto suporían unha revolución tanto no diagnóstico, abrindo o camiño para novas terapias e cunha importante repercusión a nivel de prevención.
RECOLLIDA DE FIRMAS. Desde esta semana os membros da Asociación Española Contra o Cancro (AECC) recollen firmas nas rúas de Pontevedra para pedir ao Goberno unha "Estratexia Nacional de Investigación en Cancro" e un maior apoio financeiro que favoreza o retorno de investigadores e incluso atraia ao talento científico internacional. Segundo explicaron na rolda de prensa, o reto que se marcaron con esta iniciativa é mellorar a calidade de vida dos enfermos e conseguir unha supervivencia do 70% para o ano 2030, a taxa actual de superación desta enfermidade é do 53%. Cando reúnan medio millón de firmas en toda España entregarán a súa petición ao Ministerio de Ciencia, Investigación e Universidades.
