A asociación de defensa ambiental Vaipolorío iniciará este domingo a décima novena campaña de limpeza do río Gafos, en Pontevedra, coa que pretende, ademais de contribuír á retirada de residuos da canle fluvial, "dar un toque de atención ás administracións" para que se involucren no seu coidado.
O colectivo aplaude o proxecto do Concello de Pontevedra de destapar un treito cuberto no parque de Campolongo. "Temos ganas de que iso ocorra", explicou o presidente de Vaipolorío, Gonzalo Sancho, na presentación desta nova edición da campaña.
A continuación, apuntou que estes espazos naturais "valen máis como río que como outra cousa" e que se outrora se cubriu "foi para tapar certas cousas". Deste xeito, segundo Sancho, no caso de que este proxecto se cumprise, coa colaboración da Xunta, colmaríase "unha vella aspiración e demanda" deste colectivo ecoloxista. Súmase a isto o anuncio por parte da Consellería de Infraestruturas de recuperar o río coincidindo coa remodelación das instalacións da estación de autobuses.
A campaña prolongarase durante cinco domingos e finalizará o 25 de agosto
LIMPEZA. A campaña deste ano desenvolverase durante cinco domingos ata concluír o 25 de agosto. Comezará o 28 de xullo na desembocadura do Gafos para continuar río arriba aproveitando que as melloras na rede de sumidoiros permitiron que o tramo urbano estea "en bastante bo estado", segundo Gonzalo Sancho. Acceder á canle fluvial nesta zona permitirá detectar "se hai algunha vertedura" ou algún dano na rede para a súa notificación.
Á primeira xornada sumaranse nove mozos da Asociación Juan XXIII, dedicada á formación e promoción integral das persoas con discapacidade intelectual. Durante o resto da campaña de limpeza Vaipolorío tamén vai contar coa colaboración da Asociación Arela, que, desde a súa implantación en Pontevedra en 2004 traballou con nenos e adolescentes en situación de desprotección e contribuído a que máis dun milleiro de mozos cumprisen medidas xudiciais en réxime aberto.
Tamén se sumarán nenos e nenas de 7 a 12 anos da Ludoteca Tékere, que "son os primeiros en pedir que a contorna non estea sucia", segundo precisou a súa representante, Begoña Pérez, quen apelou a concienciar "tamén ao resto da sociedade de que este espazo é de todos, e todos xuntos temos que coidalo".
As sesións de limpeza irán avanzando cara á parte media-alta do Gafos, "que é a mellor conservada", segundo Gonzalo Sancho. Onde Vaipolorío non actuará, unha vez máis, será nun tramo próximo á estación de autobuses, ocupada desde hai anos por un asentamento chabolista. Quen estea interesado en participar na campaña deberá presentarse ás 10 da mañá xunto á estación para sumarse ao equipo de limpeza.
