Nin Siri Hustvedt nin Salman Khan, nin tampouco Joanne Crory ou Javier Solana coincidirán o vindeiro venres en Oviedo coa comitiva do CIfP Carlos Oroza, pois o centro educativo pontevedrés non participará este ano nos Premios Princesa de Asturias, logo de cinco anos consecutivos elaborando e servindo o menú que degustan desde os Reis de España aos galardoados e diversas autoridades. A viaxe tivo que suspenderse por falta de interese ou oportunidade do alumnado, polo que a súa asistencia era inviable. Así o explicou este martes o director do instituto pontevedrés, Manuel Hermo, absolutamente "atafegado e desgustado" polo tratamento da noticia en diversos medios de carácter nacional.
A negativa foi contextualizada nunha polémica sobre as supostas malas prácticas do grupo Hotusa, a cadea que xestiona o hotel Reconquista, á que acusan de precarizar a tarefa substituíndo profesionais de reforzo por estudantes de hostalería que traballan gratis.
"Non comparto para nada o plantexamento da noticia publicada en eldiario.es nin como nos deixa quedar aos centros, tratándonos como se mercantilizaramos co noso alumnado", lamentou Hermo á primeira hora deste martes. A organización do centro establecía que, nas quendas rotatorias, este ano tocaríalle participar ao alumnado de FP Dual e así se lle propuxo tras incorporarse a clase o pasado 30 de setembro. "Propúxoselles aos dous grupos, pero dos 21 estudantes só cinco estaban dispoñibles, polo que desbotamos ir".
"Para nada é substituir traballadores por alumnos nin moito menos —subliña o director do Carlos Oroza—. Isto era unha actividade formativa, complementaria e extracurricular que valoramos moi positivamente tanto o alumnado como o centro". Sinala que hai coñecementos de FP que resulta "moi difícil de reproducir nunha escola" e que a empresa, a mesma que ten un convenio coa Consellería de Educación para contratar o alumnado de FP Dual nas prácticas integradas no curriculum do ciclo, "dános a oportunidade de participar neste evento". Trátase dunha xornada normal de clase "trasladada a un contorno profesional real".
"É un evento único de especial relevancia que non poderiamos ter na escola. Os responsables de sala, de cociña e mesmo a dirección do hotel reúnen por grupos o alumnado e o profesorado e explícanlles desde dentro e con todo detalle como se organiza e prepara o evento. As montaxes e a posta a punto xa estaban practicamente realizadas previamente polo persoal do hotel. O noso alumnado participa nas funcións de servizo, asistencia aos buffets, empratado e a presentación, sempre baixo a supervisión do seu profesorado e o persoal do hotel", explica Hermo.
Hotusa, recalca, "pagou sempre todos os gastos de desprazamento, aloxamento e manutención e mesmo lle dá unha gratificación a cada alumno", polo que "ata se pode dicir que esta operación lle saía máis cara que contratar persoal". Tanto alumnos como docentes "sempre valoraron positivamente esta actividade".
