As axudas municipais para gastos correntes poderán pedirse ata o 30 de outubro

A terceira das tres patas do Plan Supera 21, que o Concello de Pontevedra activou para "fomentar a reactivación económica local", xa está en marcha. O Boletín Oficial da Provincial publicou este xoves as bases para a concesión destas subvencións, que se destinarán ao pago de gastos correntes.

¿Quen pode pedir a axuda?

Os beneficiarios deste programa de axudas son autónomos e pequenas e medianas empresas (pemes), incluídas as microempresas, con cadros de persoal inferiores a 50 persoas e cuxo volume de negocio non supere os dez millóns de euros ao ano. A liña tamén está aberta a cooperativas, sociedades laborais, empresas de inserción e centros especiais de emprego.

¿Que se subvencionará?

As subvencións terán que utilizarse para a adquisición de materiais e servizos e para a realización de gastos ordinarios, consumibles e correntes coa finalidade de paliar as consecuencias da crise provocada pola pandemia do coronavirus.

Este diñeiro poderá utilizarse para cuestións como o pago de accións publicitarias, de deseño de imaxe corporativa, de reparación de distintas máquinas ou de material para o servizo de entrega a domicilio, moi utilizado durante a crise sanitaria por negocios vinculados, sobre todo, á hostalería.

¿A canto ascende a axuda?

Os beneficiarios da nova liña de axudas do Plan Supera 21 poderán recibir 5.000 euros como máximo e o importe subvencionable non poderá superar o 70% do custo da actuación ou o proxecto. O Concello reservou 300.000 euros para esta convocatoria. A contía podería ampliarse se existe demanda. Ademais, unha vez que estean concedidas as axudas, os adxudicatarios poderán recibir o cento por cento da contía de forma anticipada.

¿Ata cando se pode solicitar?

Tal e como recolle o Boletín Oficial da Provincia, o prazo de presentación das solicitudes será de 30 días naturais a contar desde este venres, é dicir, que os interesados disporán ata o 30 de outubro para formalizar o papelame correspondente.

¿Haberá novas axudas?

O Concello ten pendente de convocar unha nova liña de axudas dentro do Plan Supera 21. Son as que van dirixidas a locais de hostalería que realicen actividades de índole cultural, como concertos. A portavoz municipal, Anabel Gulías, confirma que se está traballando nesta iniciativa, que se desenvolverá no marco do plan Cabos Soltos.

Ademais de subvencións para a mellora dos negocios e o financiamento de gastos correntes, o Plan Supera 21 ten pendente aínda a resolución das axudas para a compra de ordenadores a estudantes de centros públicos da cidade. Neste caso, os fondos previstos ascenden a 400.000 euros.