O bipartito esixirá á Xunta que manteña o ciclo de Primaria da Escola de Educación Infantil de Verducido. Nunha sesión celebrada este luns, o Goberno local acordou dirixir esta queixa á Consellería de Educación, á que esixe que garanta esta liña durante o próximo curso académico.
A portavoz accidental do Concello, Carme da Silva, asegurou que a Xefatura Territorial xustifica o peche pola baixa matrícula que rexistrou o centro: dous para primeiro de Primaria e outros dous para segundo. E asegura que esta situación se debe aos continuos anuncios de supresión de ciclos que cada ano recibe a comunidade educativa, que iniciou unha serie de protestas para reclamar a supervivencia desta liña educativa.
"Nos últimos anos, a Xunta pechou numerosas escolas rurais tanto unitarias como pequenas e, como parte desa política, en Verducido sucedéronse os anuncios dun posible peche que fixeron diminuir a cociente de alumnado en Primaria", expoñen BNG e PSOE no acordo adoptado este luns. "Neste final de curso 2019-2020, a Consellería de Educación anunciou a clausura do primeiro ciclo de Primaria na escola de Verducido e con esta decisión amosa o seu nulo interese por apoiar unha escola pública de calidade e manter vos servizos públicos que precisa un rural vivo", engade o texto.
A normativa establece un mínimo de seis estudantes para manter o ciclo. En principio, a Xunta non dará marcha atrás á súa decisión, que obrigaría a recolocar aos catro alumnos que solicitaran matrícula en Verducido ao seu centro adscrito, o CEIP de Xeve, a condición de que as familias non opten por outra escola.