Mandar "unha mensaxe de positivismo e alegría aos nosos alumnos" era o obxectivo das profesoras do CEIP Parada-Campañó. Elas son conscientes de que os nenos son esa parte da poboación que máis restricións de mobilidade ten nestes tempos de coronavirus e, logo de dúas semanas enclaustrados e con outras dúas máis, como mínimo, no horizonte, un dos propósitos das mestras era manter o vínculo entre a clase e con elas mesmas.
"Aínda que son profe de peques, trato de ter un contacto moi próximo coas familias e, grazas a elas tamén, puidemos levar a cabo nosa primeira asemblea a través dunha aplicación, coma se estivésemos en clase. ¡Vaia ilusión fíxolles verse!", explica a profesora María Fanjul. "A primeira vez foi un pouco tolemia pola emoción. Víronse todos en pantalla, puxéronse a falar á vez...".
Outra das vantaxes desta iniciativa foi que tamén achega ás novas tecnoloxías a familias que quizais non estaban tan afeitas. "Encantoulles a todos e están desexando repetir", engade.
A docente admite que a suspensión das clases presenciais colleunos "desprevidos", e aínda que ela xa afacía ter contacto habitual coas familias a través do blogue de clase e o correo electrónico, "somos conscientes de que non todo o mundo ten ordenador, impresora... Propóñolles xogos interactivos, pero os pequenos non son tan independentes como os de Primaria, así que intentei facer un mix de actividades. Subo recursos na web para que as familias vaian escollendo", explica.
COCIñA. Outra das iniciativas son as actividades interactivas e os retos como o de cociña, que está a cultivar un gran éxito. "Díxenlles que cando termine todo isto teremos que facer unha festa con sobremesas" e media clase púxose ao choio colgando as súas receitas con fotos e todo luxo de detalles, desde galletas con forma de dinosauro a brownies. O próximo reto, xa logo das vacacións de Semana Santa, estará relacionado co Día do Libro, avanza Fanjul.
"Agora é importante que as emocións estean controladas e que as familias non deixen de gozar e de rir, porque o bo humor non debe decaer", sostén a docente, que xunto ás súas compañeiras mandou mensaxes de ánimo.
Así, a efectos de avaliación, o segundo trimestre dáse por terminado a data do 13 de marzo, día no que se pecharon os colexios e institutos tras decretarse a suspensión de clases presenciais.
Deste xeito, o profesorado deberá avaliar ao alumnado co traballo e, no seu caso exames, realizados ata esa data. As cualificacións notificaranse o vindeiro venres, 3 de abril, xusto antes do inicio das vacacións de Semana Santa. As familias poderán consultalas a través da aplicación Abalar Móbil, aínda que algúns centros tamén as remitirán por correo electrónico.
O 14 de abril comezará o terceiro trimestre, aínda que as clases seguirán sendo virtuais mentres a Administración non decida o contrario.
A Xunta ten previsto dotar de novas ferramentas tecnolóxicas a centros, familias e alumnado para poder mellorar o proceso educativo.
