Os partidos xa moven ficha de face ás próximas citas electorais. Os nacionalistas elixiron este xoves a Illa do Covo para presentar unha campaña en defensa do medio ambiente, "e da nosa terra", coa crise climática como inimigo a bater. A portavoz nacional do BNG, Ana Pontón, foi a encargada de pór voz a esta iniciativa, que levará ao Parlamento galego. Fíxoo en compañía do alcalde de Pontevedra, Miguel Anxo Fernández Lores, e doutros cargos públicos do partido, como os rexedores de Poio, Luciano Sobral, e de Barro, Xosé Manuel Fernández Abraldes.
Pontón sostivo que "Galicia non pode estar allea" á urxencia climática. Citou informes que auguran que en 2050 a temperatura da comunidade subirá dous graos e que as choivas se reducirán á metade no horizonte de 2030.
Fernández Lores: "Non hai escusas para reducir o impacto negativo da crise climática. Administracións e empresas deben pasar á acción"
Ademais de pór a Pontevedra como exemplo a seguir, a líder do Bloque criticou as políticas da Xunta e do Goberno central para combater "esta catástrofe". "O BNG é a garantía dos galegos para estar na vangarda política na loita contra o cambio climático", afirmou durante a súa intervención, na que citou o traballo do seu partido para "sacar a Ence da ría e para mudar un modelo forestal pirómano para vos nosos montes".
A campaña nacionalista incluirá o apoio explícito da formación á folga mundial polo clima do próximo 27 de setembro e algunhas iniciativas parlamentarias, como unha normativa autonómica contra esta crise. "Urxe dotar a Galicia dunha lei deste tipo, con obxectivos, orzamentos e medidas eficaces", explicou Pontón, que tamén proporá a creación dun comité de crise sobre a urxencia climática. "Temos unha Xunta que defende políticas que fabrican cambio climático e que só fai propostas cosméticas", criticou. "Non hai escusas para reducir o impacto negativo da crise climática. Administracións e empresas, sobre todo estas últimas, teñen que pasar á acción", reivindicou Lores.
Pontón, sobre a súa candidatura á Xunta en 2020: "Eu teño un compromiso claro co BNG e con Galicia"
Pontón, que tamén cargou contra PSOE e Podemos, aos que acusou de contribuír "ó desprestixio da política", sinalou que o seu partido está listo para unha posible repetición electoral a nivel estatal. "Se hai novas eleccións estaremos preparados para que Galicia teña voz", destacou. A líder nacionalista evitou, con todo, confirmar a súa candidatura á Presidencia da Xunta nos comicios de 2020, do mesmo xeito que Alberto Núñez Feijóo (PP). "Eu teño un compromiso claro co BNG e con Galicia", respondeu.
