Ao BNG non lle gusta que o seu socio de Goberno na Deputación, o PSOE, participe de forma activa nos actos relixiosos en honra á Virxe Peregrina. A concelleira de Festas, a nacionalista Carme da Silva, asegurou o luns que "é sorprendente que haxa cargos que asistan" a estes eventos, como o celebrado o pasado 11 de agosto no santuario da Peregrina.
Nesta misa, que inclúe a tradicional ofrenda á patroa da provincia, cobrou especial protagonismo o deputado provincial de Cooperación cos Concellos, o socialista Santos Héctor Rodríguez, que se comprometeu ante A Peregrina a traballar para priorizar a redución da pobreza.
O deputado recolleu a testemuña de Digna Rivas, que nos dous anos anteriores centrara os seus votos en pedir protección para os refuxiados e para o fin da violencia machista e no respecto á natureza e o coidado do medio ambiente.
Desde a súa chegada ao goberno da Deputación en 2015, o PSOE participou sempre nos actos litúrxicos en honra á Virxe, algo que molesta á nacionalista Carme da Silva, que o luns reivindicou o laicismo nas institucións. "Nós cremos profundamente na separación entre a Igrexa e o Estado", manifestou a edil pontevedresa de Festas. O seu partido, o Bloque, nunca participou neste tipo de eventos.
