Pontevedra está máis preto de reeditar o bipartito. BNG e PSOE mantiveron este martes a súa primeira reunión pública para negociar un posible goberno de coalición. "Houbo contactos variados e chegamos a unha conclusión: hai base suficiente para chegar a un acordo", asegurou o alcalde en funcións, Miguel Anxo Fernández Lores, na rolda de prensa posterior ao encontro, que tivo lugar no concello.
O líder nacionalista asegurou que o obxectivo da negociación cos socialistas de Tino Fernández é buscar "un proxecto común de goberno para os próximos catro anos" para que "tanto Pontevedra como os pontevedreses sigan avanzando".
As reunións entre nacionalistas e socialistas serán "permanentes"
Fernández tamén se mostrou confiado nas conversas que está a manter co seu antigo socio de goberno, aínda que afirmou que quedan asuntos que "debullar" para alcanzar un pacto. "Temos capacidade para chegar a un acordo. Xa gobernamos xuntos noutras ocasións", recordou o portavoz do PSOE.
Os contactos entre ambas as formacións serán, a partir de agora, "permanentes". A intención inicial é pechar a negociación antes do pleno de investidura deste sábado, no que Lores será nomeado alcalde de Pontevedra por sexta vez consecutiva. Aínda así, nin nacionalistas nin socialistas descartan que o broche final do posible bipartito se poña despois desa data.
Ademais de Lores e Fernández, a reunión de negociación contou coa presenza dos nacionalistas Carme da Silva, Anabel Gulías e Raimundo González Carballo. Paloma Castro e Gloria Blanco acudiron en representación da socialista.