A portavoz do goberno local de Pontevedra, a nacionalista Anabel Gulías, valorou este luns os pouco máis de 100 días do bipartito formado polo BNG e o PSOE asegurando que é "estable, con rumbo certo, que avanza cun ritmo ilusionante e cunhas relacións entre ambos os socios extraordinarias". Na rolda de prensa habitual para dar conta dos asuntos da xunta de goberno, a concelleira portavoz explicou que durante os meses de verán houbo edís que tiveron unha "intensa actividade pública" con presentación de programas, e outros que "traballaron a ritmo moi alto, aínda que non tiveron tanta visibilidade".
Neste marco, destacou o "esforzo" que se está levando a cabo por modernizar a administración "para que funcione como un reloxo suízo". Referiuse a decisións como a creación das direccións xerais ou dun servizo propio para a área de sostemento dos espazos públicos que contará cun corpo de inspectores encargado de examinar a cidade.
Tamén detallou os avances na administración electrónica, a nova oferta de emprego público ou o investimento de 2 millóns de euros no parque de bombeiros. Neste repaso, Anabel Gulías tamén fixo balance do contrato da auga, do que neste momento están en execución e xa presentados proxectos por valor de 18 millóns de euros. Así, dixo esperar "que as mesmas alegrías que nos deu a auga, nolas dea o contrato do lixo", que esperan sacar a contratación nun prazo de dous anos.
TRANSPORTE URBANO. A portavoz do goberno tamén lembrou que o Concello e a Xunta están en plenas negociacións para que Pontevedra dispoña dun transporte urbano. Neste sentido, avanzou que as conversacións "van a bo ritmo", de tal maneira que "de seguir nesta liña" a Boa Vila poderá dispor de transporte cara a primeiros de ano.
Tamén explicou Anabel Gulías que se está xestionando, a través dos fondos europeos EDUSI, o estudo do transporte a demanda, que "poderá ser unha realidade cara final de mandato".
Sobre as infraestruturas e equipamentos urbanos, a portavoz do goberno resaltou o "bo ritmo de execución" dos campos de herba sintética do rural, a posta en marcha do Mercado de Abastos ou a próxima apertura das piscinas municipais de Campolongo.
O goberno local tamén traballa nunha planificación para "estender o modelo mandato dos barrios", completar o Camiño de Santiago, traballar nas rúas perimetrais do Campo da Torre ou abordar as reformas das rúas do Monte do Taco e do barrio de San Roque.
Finalmente, neste repaso a "algúns dos alicerces básicos que marcarán a estratexia política municipal deste ano e dos próximos", Anabel Gulías tamén resaltou a importancia da carteira de igualdade e das políticas ambientais.
