Os Bombeiros de Pontevedra sufocaron este venres de madrugada un incendio que arrasou a lavandería dun hotel da cidade do Lérez, afortunadamente sen provocar danos persoais. O lume detectouse ao redor da unha e media da noite no Hotel Madrid, segundo confirmaron desde o parque de bombeiros.
As lapas orixináronse no propio cuarto de lavandería, por causas que aínda se investigan, e afectou principalmente ás lavadoras e secadoras que había no interior. O incendio ocasionou danos tamén nas tubaxes de auga do inmoble, o que provocou unha inundación no garaxe do edificio.
Os bombeiros controlaron rapidamente as lapas, evitando que se estendesen por outros espazos do inmoble, e ventilaron todas as instalacións. A pesar de que algúns hóspedes saíron á rúa alertados polo despregamento dos servizos de urxencia, non foi necesario desaloxar o hotel.
