Unha parte dos efectivos da Brigada 'Galicia VII' (Brilat) que se despregarán en menos de dous meses en Líbano participaron nunha serie de manobras nos campos de adestramento do Ferral de Bernesga e O Teleno, ambos na provincia de León, co obxectivo de ultimar a preparación de face á citada misión internacional.
Un dos aspectos nos que están a traballar con máis interese nos últimos días ten que ver coa condución dos vehículos pesados (tanto o todoterreo como os blindados) en condicións adversas, dado que as infraestruturas que terán que percorrer na contorna da Blue Line (a liña imaxinaria que delimita a fronteira entre Líbano e Israel), están en malas condicións.
Paralelamente, unha avanzada do acuartelamento pontevedrés continúa en Mali. O motivo, a preparación da segunda misión no estranxeiro que, de forma simultánea, afrontará a Brilat a partir de novembro. Uns e outros deixarán a base "Xeral Trasfogueiro" baleira durante uns meses.
