Cun anticiclón ás portas (os meteorólogos esperábano para este martes), aínda que coa posibilidade de novas choivas moi aberta de cara á fin de semana, as patrullas da Brigada Galicia VII (Brilat) parten cara ás súas bases nas zonas de maior risco de incendio forestal da comunidade autónoma. Este mércores comeza unha nova edición da operación Centinela Galego, un despregamento que se iniciou logo da catástrofe forestal de 2006 e que se mantén desde entón co fin de disuadir posibles incendiarios de efectuar calquera manobra tendente a provocar incendios.
O conselleiro de Medio Rural, José González Vázquez, estará na base General Morillo, sede da Brilat, para asistir á saída das 27 patrullas que, inicialmente, comporán o continxente militar nos montes das provincias da Coruña, Ourense e Pontevedra. Delas, 22 proceden da unidade que organiza o despregamento, mentres que os cinco restantes se forman a partir de membros do Terzo Norte de Infantería de Marina con sede en Ferrol.
O proxecto, que se desenvolve ao amparo dun convenio marco subscrito entre a Xunta de Galicia e o Ministerio de Defensa, estará coordinado sobre o terreo por Antonio Romero Losada na súa condición de xeral xefe da brigada pontevedresa.
As patrullas, que desenvolverán o seu labor en trece municipios, poderán ser ampliadas ata 50 e incluso 75, se as necesidades así o requiren, o que fará que efectivos militares que non estean despregados nun momento dado terán que permanecer en estado de prealerta.
Os militares volverán dispoñer de avións non tripulados para a vixilancia desde a distancia, unha ferramenta que se mostrou moi eficaz nos anos anteriores. Trátase do sistema Raven, que efectúa uns 50 voos cada verán sobre os montes galegos.
As previsións apuntan a que os membros da operación percorrerán uns 500.000 quilómetros entre o 15 de agosto e o 1 de outubro, nun período no que, se non hai novidades de última hora, participarán uns 500 militares sobre o terreo.
