Só tres dos máis de 3.000 efectivos que compoñen a Brigada Galicia VII deron positivo por coronavirus. Dous deles trouxeron a enfermidade desde Madrid, onde acudiran para participar nun curso de formación, e un terceiro contaxiouse tras entrar en contacto cun familiar seu que estaba infectado. Os tres pasaron a corentena nos seus domicilios e recupéranse, segundo fontes do cuartel xeral, da forma esperada.
A incidencia, practicamente nula, da Covid-19 na Brilat, pode parecer sorprendente se se ten en conta o labor que están a desenvolver os soldados da maior unidade militar do Nordés Peninsular: a desinfección de puntos nos que os contagios están á orde do día: centros sanitarios, residencias de maiores ou nós de comunicacións polos que pasan multitude de persoas das máis diversas procedencias.
O segredo, tal e como explica Pablo Ponce de León, comandante da brigada, reside nas medidas de seguridade adoptadas polos militares desde o principio da pandemia. "Somos moi estritos coas medidas de precaución e co distanciamento social. Quizais ese sexa o motivo de que non teñamos positivos por motivos do noso traballo". E é que, como explica o alto cargo da base pontevedresa, ningún soldado da Brilat contaxiouse no exercicio da súa función, que, dito sexa de paso, é das máis arriscadas e expostas ao virus de cantas desenvolven os traballadores esenciais nesta crise.
Por pór un exemplo, na xornada deste luns o equipo NRBQ (especializado en guerra bactereológica e nuclear e que adaptou as súas capacidades para operar fronte ao virus) traballou en labores de desinfección nas residencias de maiores de Cerdedo, Forcarei, Vila de Cruces ou Covelo, así como no Fogar Residencial Vistahermosa de Vigo, o Ovida de Oviedo ou a Casa Residencial de Villaralbo, en Valladolid.
Os soldados pontevedreses, que contan cun equipo propio de NRBQ, recibiron no marco do
A Brilat, ademais, segue combinando a desinfección co patrullaje. Un exemplo: onte vixiaron o cumprimento das restricións de mobilidade en Pontevedra, Ourense, Moaña, Mondariz, Oviedo, Xixón e Valladolid. Para rematar, seguen apoiando ao Hospital de Asturias e aos controis fronteirizos con Portugal.
