O acuartelamento de Figueirido acolleu este xoves o acto de despedida do xa ex xefe da Brilat, Antonio Romero, recentemente ascendido a xeneral de división, quen pasará agora a dirixir a intelixencia da Defensa nacional.
A cerimonia, que contou con numerosas autoridades civís e militares, consistiu na despedida do homenaxeado da bandeira e dos 2.000 militares que integran o Rexemento Isabel a Católica 29, formados na ampla chaira.
Romero deu as grazas a Deus, á sociedade pontevedresa, ás autoridades locais e aos medios de comunicación "polo agarimo que lle demostrastes á Brilat e porque tanto á miña muller como a min nos fixestes sentir como en casa. A estancia aquí fíxosenos fácil cómoda e moi grata. Levaremos a Pontevedra sempre no corazón".
Recordou aos militares que "a defensa de España depende de que vós cumprades adecuadamente co voso deber" , e lles arengou a seguir traballando na mesma liña "porque me demostrastes que sodes capaces de case todo".
Posteriormente, o novo xeneral de división destacou que o seu maior logro profesional foi dirixir o continxente español no Líbano entre novembro e maio, misión que mereceu o recoñecemento internacional da Otan.
Finalmente, o novo responsable da intelixencia militar confiou en que a finais deste mes chegue a súa substitución á base pontevedresa, quen se encargará de organizar a próxima intervención da Brilat nunha misión internacional, prevista para 2021.