CRUZ VERMELLA Pontevedra celebra o Día Universal dos Dereitos da Infancia co lanzamento da nova campaña do programa de Familias Acolledoras, tamén coñecidas como "familias paraugas", que ofrecen un fogar de forma temporal aos menores que non poden estar coas súas nais e pais porque estes non están nas condicións idóneas para o seu coidado.
A campaña que ten como lema Querer é poder, pretende animar a calquera persoa, matrimonio ou parella de feito, con ou sen fillos a dar o paso e converterse nunha familia acolledora.
En Galicia hai 221 nenos acollidos por unha familia, dos cales 54 están na provincia de Pontevedra, pero nestes momentos hai outros 11 menores na provincia que están á espera de acollemento.
A campaña Querer é poder apoiarase en varias historias ilustradas que teñen como protagonistas a menores que están a ser acollidos
Outra das ideas clave do programa de Cruz Vermella é que as familias acolledoras poden cambiar a vida de moitos nenos e nenas.
A campaña Querer é poder apoiarase en varias historias ilustradas que teñen como protagonistas a menores que están a ser acollidos. A primeira historia que verá a luz será a de Antía, unha nena de 6 anos, que pasa de estar nun centro a vivir cunha familia acolledora.
Así mesmo, distribuiranse diferentes materiais e desenvolveranse actividades en diferentes localidades galegas, entre ela, un concurso de debuxo.
Cruz Vermella xestiona o programa de Familias Acolledoras da Xunta de Galicia e conta para iso con seis equipos específicos na Coruña, Santiago, Lugo, Ourense, Pontevedra e Vigo.
A organización céntrase nos acollementos en familia allea, é dicir, os acolledores e acolledoras son persoas que non teñen unha relación de parentesco cos menores.
O obxectivo xeral deste programa é proporcionar unha atención temporal a aqueles menores en situación de risco, desamparo ou desprotección social, tutelados ou en garda pola Xunta de Galicia, nun ambiente familiar normalizado, alleo á súa familia de orixe, por non existir esta ou non ser idónea para coidalos.
