Un de cada cinco traballadores do agro na provincia supera os 60 anos

Os traballadores do sector agrogandeiro convertéronse estes días en protagonistas de numerosas mobilizacións ao longo e ancho de España para reclamar prezos máis xustos para os seus produtos, máis control dos artigos que chegan de fóra da Unión Europea sen os estándares que se lles esixen a eles e, en definitiva, máis apoio para un sector que subsiste a duras penas mentres os intermediarios obteñen grandes beneficios á súa costa. Son precisamente estes e outros problemas os que veñen minguando o número de explotacións e de traballadores do agro, unha realidade que tamén se reflicte nos concellos pontevedreses.

Na provincia, o número de afiliados á Seguridade Social na agricultura, a gandería e os servizos relacionados con ambas é dunhas 6.000 persoas, de acordo co dato de hai un ano recollido no Informe do Mercado de Traballo do Sevicio Público de Emprego (SEPE). Soamente doce meses antes, esa cifra era un 1,02% maior e o máis preocupante é que ese descenso non é novo, senón que vén producíndose desde hai tempo.

Nisto ten moito que ver o feito de que un agricultor cobre, por exemplo, 20 céntimos por cada quilo de patacas que vende, mentres o consumidor final paga por esas mesmas patacas ao redor de 1,20 euros no supermecado, e as mesmas diferenzas danse con todos os produtos da horta e da granxa.

POR CONTA PROPIA. Outra realidade do agro é que a inmensa maioría dos seus profesionais son traballadores por conta propia. Na provincia de Pontevedra, esa é a situación do 68,5% deles, mentres que só un 31,5% están contratados por conta allea, sendo o agrogandeiro un dos ámbitos nos que a proporción de autónomos sobre a de asalariados é máis pronunciada.

Tamén de acordo co SEPE, o mesmo sector acumulaba a principios de 2019 algo máis de 1.314 demandantes de emprego en terras pontevedresas, o que supón un 1,96% sobre o total das persoas en busca de traballo inscritas na provincia.

SECTOR ENVELLECIDO. Ademais de ir perdendo cotizantes, nos municipios de Pontevedra o campo está bastante envellecido, posto que un 19,59% dos seus profesionais afiliados á Seguridade Social superan os 60 anos. Precisamente, os problemas de subsistencia aos que se enfrontan os traballadores do campo provocan que en moitas explotacións non haxa substitución xeracional, pois os máis novos optan por buscar outros empregos menos sacrificados e non tan expostos a unhas condicións tan dificultosas como a agricultura e a gandería. E, entre outros factores, é esta falta de substitución nos negocios agropecuarios a que axuda a acentuar aínda máis o despoboamento das zonas rurais, un problema que está en boca de todas as Administracións Públicas pero ao que, de momento, ningunha delas fíxolle fronte con medidas realmente efectivas.

CIFRA DE EXPLOTACIóNS. No conxunto de concellos da provincia hai alredor de 14.000 explotacións agrícolas, o que representa o 18,3% de todas as que existen na comunidade autónoma. A Coruña e Lugo son as que levan a palma, ao aglutinar o 33,7% e o 32,6%, respectivamente, do total galego, segundo o último dato recolleito (en 2016) polo Instituto Galego de Estatística.

De acordo coa mesma fonte, todas as explotacións de Pontevedra suman 100.663 hectáreas, pero a superficie agraria realmente utilizada apenas excedía as 66.000 xa no ano 2016. A día de hoxe esa cifra é aínda menor.