Saír do habitual contexto laboral co fin de axudar a outras persoas. Traballadores do Hospital Quirónsalud Miguel Domínguez de Pontevedra protagonizan un calendario solidario para recadar fondos en favor do labor que desenvolve a Asociación Galega de Fibrose Quística.
Os profesionais dos diferentes servizos deseñaron esta iniciativa solidaria mostrando a súa creatividade como modelos, posando en diferentes localizacións da capital lerezana como A Peregrina, a contorna de Mugartegui ou a zona da Xunqueira. Tamén se desprazaron a outros espazos próximos como a contorna da Caeira ou a praia de Lourido.
A recadación pola venda do calendario destinarase ao integramente ao programa de acollida, información e apoio ás persoas con fibrose quística e as súas familias da Asociación Galega de Fibrose Quística, que conta na actualidade con 195 socios en Galicia e presta apoio a un total de 67 enfermos e ás súas familias.
Un de cada 2.500 recén nacidos padece esta enfermidade
A fibrose quística afecta a 1 de cada 2.500 recén nacidos en España. Mentres que 1 de cada 25 habitantes son portadores sans da enfermidade. Trátase unha doenza crónica, hereditaria, non contaxiosa e dexenerativa que afecta principalmente aos pulmóns e ao sistema dixestivo.
Cientificamente caracterízase por unha alteración xenética que afecta as zonas do corpo que producen secrecións, dando lugar a un espesamiento e diminución do contido de auga, sodio e potasio, o que ten como consecuencia a obstrución das canles que transportan esas secrecións, ademais de producir infeccións e inflamacións que destrúen zonas do pulmón, o fígado, o páncreas e o sistema reprodutor, principalmente.
Entre os síntomas máis acusados destacan o sabor salgado da pel debido ao alto contido en cloro e sodio, problemas dixestivos, dores abdominais, peso por baixo do normal, obstrucións intestinais e diferentes problemas respiratorios.