O cambio da ordenanza para que os pontevedreses só paguen pola auga que consuman segue en estudo no Concello. A eliminación dos consumos mínimos que agora pagan as vivendas (15 metros cúbicos) e os negocios (45 metros cúbicos) é unha das melloras do novo contrato de abastecemento, que o pasado mes de outubro cumpriu dous anos. A súa xestión correspóndelle á empresa Viaqua, que manterá a concesión durante 20 anos, isto é, ata 2038.
A reforma do regulamento aínda segue pendente. E, con toda probabilidade, non será aprobada durante o presente exercicio, tal e como o pasado mes de xuño anunciou o concelleiro de Facenda e responsable da concesión da auga, Raimundo González Carballo.
Unha das novidades incluídas no contrato de Viaqua ten que ver cos contadores domésticos e as acometidas, cuxo mantemento deixaría de depender dos clientes e pasaría a ser responsabilidade da adxudicataria, que debería facerse cargo da súa conservación e reposición.
OUTRAS MELLORAS. O novo contrato da auga, contra o que recorreron sen éxito dous licitadoras do concurso, anunciou unha choiva de melloras e proxectos extra dos que aínda non houbo noticias. Entre eles figura a construción dunha minicentral hidroeléctrica no Lérez ou a creación dunha unidade de control de verteduras.
Na relación tamén se inclúen a instalación dun sismógrafo no encoro do Pontillón do Castro; a renovación da flota de vehículos da concesionaria; o aumento do persoal do servizo en 13 persoas; a creación dun fondo social para veciños sen recursos; a transformación do vello depósito de San Amaro nunha exposición permanente dun dos pais do abastecemento de Pontevedra, o arquitecto Alejandro Rodríguez Sesmero; a mellora do sistema de iluminación da Estación de Tratamento de Auga Potable do Lérez ou a instalación dun cargador de móbiles na cidade que utilizaría a enerxía hidráulica para producir enerxía.
