A concelleira do Ciclo da auga de Pontevedra, Carme da Silva, detallou que ao longo da última semana o río Lérez un comportamento "bastante estable", en contraste coa quincena anterior, na que o caudal baixara de xeito "moi preocupante" e obrigara a activar as medidas de aforro por parte do Concello da cidade e outros da súa contorna.
En concreto, este luns celebrouse unha reunión do grupo de información e seguimento do plan excepcional ante a seca, constituído por todos os municipios que se abastecen do río Lérez. No encontro tamén participou a directora de Augas de Galicia, Teresa Gutiérrez.
Foi un encontro telemático no que a edila do Ciclo da auga de Pontevedra ofreceu as últimas novidades ao redor da situación hidrolóxica do Lérez, despois do seguimento diario dos recursos que ofrece o río.
"O peche de Ence e dos turbinados das centrais que hai no río parece que lograron manter, de momento, a estabilidade no caudal", sinalou Da Silva.
E é que o caudal medio está estable nuns 1,6 metros cúbicos por segundo, "o que nos mantén en situación de prealerta, pero permite manter o abastecemento a todos os concellos usando soa a auga do río", explicou.
NOVA PROPOSTA DE PONTEVEDRA
Na reunión entre os concellos e Augas de Galicia, Da Silva trasladou unha nova proposta ao organismo autonómico que ten como basee as diferentes presas existentes ao longo do río Lérez: Pontebora (que retén 95.000 metros cúbicos de auga), San Xusto (82.400 m3), Arroibar (40.900 m3), Anllo (190.000 m3), Almofrei 1 (5.000 m3) e Almofrei 2 (5.000 m3).
En total, estas presas, que son hidroeléctricas -excepto a de Ence, en Pontebora-, teñen embalsados un total de 418.000 metros cúbicos. Estas mini centrais non están turbinando na actualidade e non teñen un consumo neto de auga, por iso non teñen un impacto agora mesmo no caudal do río, pero si teñen unha capacidade de almacenamento importante.
A proposta do Concello de Pontevedra consiste en que, de empeorar a situación do caudal do río, xa co Lérez case seco, fágase un traballo de coordinación e laminación da auga destas presas para que ir combinando estas reservas coas do Pontillón de Castro. Segundo dixo Carme Da Silva "pode ser un traballo custoso de coordinación, pero útil no caso de necesidade".
GRANDES CONSUMIDORES
Para rematar, a concelleira sinalou que os servizos técnicos municipais están a estudar a todos os grandes consumidores de auga do municipio, que son aqueles que empregan máis de 2.000 m3 ao ano, aínda que o Concello de Pontevedra tamén revisará e anotará outros cun consumo menor a esta cifra, como algunhas das empresas situadas no polígono industrial do Campiño ou os hoteis da cidade. O propósito desta iniciativa é "simplemente informarlles e recomendarlles actuacións que reduzan o consumo".
O Consistorio da capital tamén está a traballar na redacción dunha listaxe de consumidores vulnerables, como poden ser os hospitais ou as residencias, ademais de calquera instalación que non poida quedar sen abastecemento baixo ningún concepto.
Neste caso, o que se pretende é ver "se é preciso tomar algunha medida extraordinaria para garantir o consumo e o abastecemento nestes espazos no caso de que a situación acabe por ser de urxencia", comentou a edil.
