O secretario de organización da Unión Comarcal de Comisións Obreiras de Pontevedra, José Luis García Pedrosa, anunciou que o seu sindicato defenderá "nos despachos e na rúa" os postos de traballo en Ence e Elnosa.
Pedrosa compareceu este luns en rolda de prensa para anunciar a posición do seu sindicato ante o "conflito político" aberto en torno ao complexo industrial de Lourizán por mor da proposta do Partido Socialista de crear unha mesa de negociación co Goberno do Estado para abordar o traslado da pasteira. En primeiro lugar, Comisións Obreiras lamentou que non se pensou nos traballadores como unha das partes implicadas nesta mesa de diálogo. "Ademais, cuestionamos a forma, o fondo e a utilidade desta iniciativa", indicou.
García Pedrosa advirte de que retomarán as mobilizacións na rúa
O traslado da fábrica de celulosa é inviable segundo entende este sindicato, que alerta de que o emprego na comarca de Pontevedra é "miserable" e adoece dunha "deterioración permanente". Por este motivo farán unha defensa activa dos seus postos de traballo" e prevén "disputar todos os espazos" con quen cuestionen a continuidade de Ence e de Elnosa.
En referencia á recente reunión con responsables do Goberno de Pedro Sánchez coa Asociación pola Defensa da Ría, Comisións Obreiras avanza que irán "a Moncloa a entregar outro dossier" e igualmente farano con calquera iniciativa parlamentaria. Tamén explicou que retomarán as mobilizacións na rúa.
Finalmente, García Pedrosa criticou o delegado do Goberno en Galicia, Javier Losada, porque aínda non lles contestou a unha solicitude de entrevista pedida hai un mes, e tamén lamentou os posicionamentos públicos dalgúns mandatarios socialistas por dar por feito que será negativo o informe do Consello de Estado sobre a concesión dos terreos de Elnosa. "Parécenos politicamente desacertado e, desde o punto de vista legal, pode haber algo similar á prevaricación".
