Comisións Obreiras saíu este xoves ao paso da choiva de opinións e declaracións vertidas desde distintas frontes políticas ao redor de Ence. E en todos os casos criticou que moitos interlocutores "xa dean por vendida a pel do oso antes de matalo", en referencia a quen dan por feito que o Tribunal Supremo manterá a sentenza da Audiencia Nacional que declara ilegal a prórroga concedida en xaneiro de 2016. "Isto non está perdido, nin moito menos. Hai moitos precedentes nos que se ten dado a volta á situación, e é totalmente falso que a decisión sexa irreversible", indicou o seu portavoz, José Luís García Pedrosa.
No entanto, o sindicato traballa xa en alternativas que permitan garantir a continuidade da pasteira, na súa actual localización e onte volveron pór sobre a mesa unha solución xa esbozada hai anos, pero que non chegou a callar: integrar Ence na Autoridade Portuaria de Marín.
Pedrosa considera que hai antecedentes para ter esperanzas nesa alternativa "xurídico-administrativa", como as ducias de empresas adscritas ao Porto de Vigo "que non están afectadas pola Lei de Costas e poden manter a súa actividade industrial" ou os recheos do Porto marinense, cuxa sentencia en contra nunca chegou a executarse, o que permite manterse a firmas como Gonvarri, Pérez Torres ou Cabomar.
"Os recheos do Porto de Marín tamén teñen unha sentenza en contra e aí seguen Gonvarri, Cabomar, Pérez Torres...", di Pedrosa
Neste mesmo escenario situou a Petronor, que conseguiu unha prórroga doutros 40 anos na localidade vasca de Muskiz grazas ao apoio do grupo EAJ-PNV.
"Non quixemos propoñer esa opción na mesa de diálogo do outro día, aínda que sería o mellor escenario para facelo, para non dar a sensación de que damos por perdida a loita xudicial", aclarou.
Mentres agardan a presentación "de media ducia de recursos" contra a resolución da AN, o líder de CC OO instou a levar a cabo "unha gran mobilización social, que aglutine non só os traballadores, porque o impacto de Ence é moito máis que laboral, é social, é económico". Ao mesmo tempo, anunciou que o persoal continuará coas súas protestas na rúa.
O obxectivo é facerlle ver ao maxistrado que "o peche definitivo da actividade da empresa suporía unha auténtica catástrofe para todas as familias que estas vinculadas, dunha ou outra forma ao proceso produtivo da empresa, o que provocaría consecuencias irreparables, que esperamos se poidan evitar".
Os participantes nesta campaña deben cubrir un cuestionario 100% certificado antes do 30 deste mes. Ese día será remitido o manifesto xunto coas rúbricas recollidas durante esta iniciativa.
