O cemiterio de cinzas de San Amaro sae do caixón. O Concello deu luz verde este luns ao expediente de contratación das obras para ampliar o camposanto municipal. O proxecto, que se presentou en 2016, retómase agora con cambios. O máis importante afecta á execución dos traballos, que farase por fases e en distintos anos.
A pesar de que a actuación contará cun orzamento global de 474.656,54 euros, a primeira parte da intervención sairá a licitación por uns 100.000. Con este investimento, o Goberno local pretende construír 312 novos columbarios, que se unirán aos seis que existen na actualidade. Destes últimos, tres están baleiros.
A obra tamén contempla a creación dunha zona de cerimonias dirixidas a distintos credos relixiosos ou eventos de carácter laico. "Será un dos primeiros cemiterios de Galicia en ofrecer cerimonias funerarias de diversa índole", destacou a portavoz municipal, Anabel Gulías, na rolda de prensa posterior á Xunta de Goberno local.
O contrato que agora sae a contratación contará melloras valoradas en 50.000 euros, que as empresas interesadas poderán incluír ou non nas súas ofertas. Unha delas é un conxunto escultórico de Caxigueiro e a outra é un mural da pintora Amelia Palacios.
"Será un dos primeiros cemiterios de Galicia en ofrecer cerimonias funerarias de diversa índole", destacou Anabel Gulías
A ampliación do cemiterio de San Amaro realizarase a través dunha parcela anexa á instalación, que conta cunha superficie de 5.800 metros cadrados. Na primeira fase das obras ocuparanse 2.500 metros. O resto reservarase para a seguinte parte da actuación, que consistirá na creación dunha pradería para que os veciños esparcisen alí as cinzas dos seus seres queridos.
"Estamos moi contentos coa posta en marcha deste proxecto, que é único", destacou Gulías, que fixo referencia a un dos retoques do proxecto orixinal, que prevía máis dun milleiro de columbarios. "Non parece razoable. Os 312 é unha cifra asumible", aclarou.
O que aínda non está claro é o prezo do servizo nin a fórmula que se utilizará para adxudicar as novas urnas funerarias. Con toda probabilidade licitaranse en réxime de concesión, como se fai cos nichos.
