De 60 a 126. É o salto no número de chamadas ao 016 efectuadas desde a provincia de Pontevedra entre maio de 2019 e o mesmo mes do presente ano. Por medio, unha pandemia mundial que obrigou a decretar o confinamento da poboación, o que fixo que moitas mulleres tivesen que quedar, literalmente, encerradas cos seus agresores durante meses.
As circunstancias facían prever que os episodios de agresións machistas dispararíanse e algúns dos indicadores cos que conta o Ministerio de Igualdade confirman que o confinamento foi especialmente duro para algunhas mulleres. Deste xeito, o aumento no número de chamadas ao número de atención a vítimas de violencia de xénero é unha realidade en todas as provincias, aínda que a de Pontevedra é a terceira na que máis creceron, tras a cidade autónoma de Ceuta e Segovia. Esta tendencia comezou xa nos primeiros meses de confinamento, facéndose notar en marzo e marcando un repunte no número de chamadas do 83% xa no mes de abril.
A situación de peche, unido á tensión xerada pola pandemia e a falta de vías de escape ou "distraccións" para o maltratador, poden ser os motivos polos que se dispararon as peticións de axuda a través da mencionada liña.
A maioría das consultas realizadas ao 016 partiron das propias vítimas, mentres un 29% das chamadas foron efectuadas por familiares, achegados ou persoas con outro tipo de relación coas vítimas. Deste xeito, aínda que o confinamento podería ser un momento no que veciños ou familiares detectasen situacións de malos tratos, isto non se traduce nas chamadas a este número.
Desde a posta en marcha deste servizo de atención telefónica, desde a provincia de Pontevedra realizáronse 14.646 consultas.
Por outra banda, a provincia conta na actualidade con 1.083 casos de violencia de xénero activos, dos cales un deles está considerado de risco extremo para a integridade da vítima. Outros cinco son catalogados de risco alto e os demais considérase que supoñen un nivel medio ou baixo para as mulleres. Na comunidade hai outro caso máis de risco extremo, neste caso na provincia de Ourense. Neste sentido, 591 mulleres reciben protección oficial na provincia, xa que se aprecia que se atopan nunha situación de inseguridade.
Ademais, na provincia de Pontevedra outorgáronse ao longo do ano pasado 353 ordes de protección a mulleres por violencia machista. Do mesmo xeito, hai 25 dispositivos electrónicos de seguimento a vítimas activos coa finalidade de garantir a súa protección fronte ao seu agresor e 161 usuarias activas no servizo telefónico de atención (Atenpro).
No outro extremo, 133 homes da provincia cumpren condena na prisión por delitos relacionados coa violencia de xénero no ámbito da parella.
63 ASASINADAS. Desde que comezaron a contabilizarse o número de mulleres asasinadas por violencia machista, en 2003, a provincia de Pontevedra acumula 26 vítimas mortais pola violencia machista, que deixaron orfos a seis nenos. Na dramática lista de crimes, Galicia suma 63 mulleres asasinadas e en todo o territorio español a cifra ascende a 1.058.
Só no que vai de ano, foron asasinadas 25 mulleres que deixaron orfos a 12 menores en todo o territorio español. Ademais, tamén os menores padecen a secuela da violencia ata ser asasinados, de modo que en 2020 xa se acumulan tres asasinatos machistas a menores e o número ascende a 37 se se ten en conta o reconto que leva a cabo desde o ano 2013.
De todos os xeitos, segundo explican desde a propia Policía Local, os datos non son determinantes xa que quen unifica toda a información en relación aos casos de violencia machista é a Policía Nacional. "Nós pasámoslle toda a información a eles", explican os axentes.
Así, a media de detencións por violencia de xénero ao ano realizadas polos axentes municipais adoita ser de entre 15 e 16.
No último mes, producíronse intervencións en inmobles nos que o agresor entrara agredindo á súa exparella e aos seus familiares. Nun dos casos, a vítima tivo que ser trasladada ao Hospital de Montecelo debido ás feridas causadas polo maltratador. Neste caso, a maioría das chamadas efectúanas os veciños.
