O Hospital Montecelo celebrou este xoves unha xornada de concienciación con motivo do Día Internacional da Enfermidade Pulmonar Obstructiva Crónica (EPOC) organizada por profesionais do servizo de Pneumoloxía do Complexo Hospitalario Universitario de Pontevedra (CHOP).
Con actividades como esta se busca ter "unha convivencia entre o persoal sanitario e os pacientes, que sentan que son máis que individuos que veñen á consulta a que lles poñan cousas", explica o xefe do servizo, Adolfo Baloira. Así, ademais de resolver as dúbidas que os pacientes puidesen ter, un deles deu unha charla contando a súa experiencia, houbo un debate e outras actividades. Durante a xornada tamén se realizaron espirometrías para medir a capacidade e función pulmonar das persoas interesadas.
En base ás estatísticas publicadas, a área sanitaria de Pontevedra e O Salnés conta con 15.000 pacientes con Epoc e, a pesar de que non existen cifras exactas do número de persoas diagnosticadas, pois a gran maioría de casos detéctase xa en Atención Primaria, o servizo de Pneumoloxía de Pontevedra atende cada ano 600 novas consultas de pacientes con sospeita de enfermidade pulmonar obstructiva crónica.
O 80% das causas que producen a Epoc débese ao tabaco
Entre os síntomas desta patoloxía, o máis importante é a progresiva "dificultade para respirar, incluso con algo tan simple como subir seis chanzos". Ademais, habitualmente entran nun "círculo vicioso, ao moverse cada vez menos o que xera un incremento de peso", asegura Baloira.
O 80% das causas que producen a Epoc débese ao tabaco, pero no 20% restante non existe unha causa clara. "Tamén inflúe a contaminación e as cociñas de leña, que antigamente tamén eran un factor de risco". Ademais, aínda que existe certo compoñente xenético, "en principio non é hereditaria".
En xeral, o perfil do paciente que sofre esta patoloxía é o dunha persoa que fumou durante máis de 20 anos, polo menos un paquete de cigarros diarios; que a miúdo ten certo grao de expectoración e que nota que se fatiga antes do esperado. Tamén pode ter sobrepeso, pero en ocasións adoita estar por baixo do seu peso normal. Outro dato a destacar é que a Epoc é máis frecuente en homes, aínda que na última década duplicouse a porcentaxe de mulleres diagnosticadas.
En canto ao tratamento desta enfermidade crónica, o primeiro paso é deixar o tabaco. Ademais, para mellorar os síntomas a base son os broncodilatadores, aínda que "nos casos máis graves" chegan a utilizarse certos aparellos para respirar mellor mentres se dorme.
