O Club Naval urxe o dragado do Lérez para potenciar o turismo náutico en Pontevedra. O presidente do colectivo, Carlos Paz, lanzou o martes unha nova mensaxe á Xunta para que desbloquee un proxecto "fundamental" para gañar calado e impedir que as embarcacións encallen no fondo mariño cando baixa a marea. "Isto non pode demorarse máis", destacou.
A retirada dos sedimentos do fondo do río é unha histórica reivindicación do club, que viu como nos últimos anos un dos seus catro pantaláns quedou case inutilizado. A do dragado é unha vella demanda de distintos colectivos sociais en Pontevedra. Comezou a traballarse nela en 2009.
En 2011 iniciáronse os trámites, pero os cambios lexislativos en 2014 atrasaron os mesmos. En xaneiro de 2017, o anteproxecto foi sometido a exposición pública, isto é, á fase de alegacións. Desde entón, Portos de Galicia mantén esta actuación no caixón por falta de consenso co sector marisqueiro, que pedía que os lodos se depositasen noutro lugar que non fose detrás da illa de Tambo. A alternativa impulsada polo organismo autonómico foi a de trasladar estes sedimentos na contorna de Sálvora, na desembocadura da ría de Arousa, o que tamén xerou certa polémica nesta comarca.
Desde 2017 Portos de Galicia mantén o dragado do Lérez no caixón por falta de consenso
A incerteza sobre estas obras segue facendo madeixa no porto deportivo de Pontevedra. Aínda que a instalación ten capacidade para 142 barcos, a atracada media do mes de agosto sitúase en 75 embarcacións. Os patróns de moitas delas elixen xa outros portos, como o de Combarro, polos problemas de calado no Lérez.
O recinto portuario xestionado polo Club Naval renovou este ano a súa concesión administrativa. A autorización da Xunta terá vixencia ata maio de 2033 e obrigará á entidade a realizar unha serie de investimentos de polo menos 50.000 euros.
MELLORAS. O plan de melloras previsto deberá executarse nun prazo máximo de catro anos. Entre as actuacións que levarán a cabo figuran a renovación do terceiro pantalán, do que se retirará a madeira para cambialo por PVC, un material máis resistente e duradeiro; o peche do espazo dedicado ás piraguas con cristaleiras e varandas de aluminio e aceiro inoxidable, así como o mantemento das instalacións, que abriron as súas portas en 1994.
O Club Naval aspira tamén a reabrir a cafetería, que pechou en 2011. O presidente da institución, Carlos Paz, reuniuse onte cun novo empresario interesado neste local.
