A aldea neolítica de Salcedo estreouse este sábado cunha comida propia da idade de bronce. Os invitados ao banquete, no que se serviu carne ao espeto e salmón cociñado entre follas e barro, foron os membros da directiva da Comunidade de Montes da parroquia, impulsores deste proxecto.
O parque arqueolóxico ocupa unha parcela de 1.500 metros cadrados no lugar de Outeiro das Mouras. O solar foi ocupado no seu día pola Brilat, pero os comuneiros gañáronlle a partida ao Ministerio de Defensa ao lograr recuperar a súa titularidade tras unha longa batalla xudicial.
A construción do recinto ven agora a luz tras dous anos de trámites. O Concello desbloqueou o proxecto o pasado mes de abril ao concederlle a licenza necesaria para iniciar os traballos, que contaron cun orzamento de 39.744,65 euros. Deste diñeiro, 26.072,49 euros proceden de fondos europeos.
Gran parte do proxecto financiouse con fondos europeos
Os comuneiros preparan xa a apertura ao público da aldea neolítica, que é moi similar á que hai no municipio de Campo Lameiro. A de Salcedo conta cunha cabana comunal, tres pallozas, currais, fosas de almacenaxe, un estanque e unha zona na que se recrearán as fogueiras que facían os antigos moradores destas áreas.
EMPALIZADA
O poboado prehistórico está delimitado por unha empalizada de madeira. A zona tamén conta con árbores plantadas polos comuneiros de Salcedo hai dous anos, como carballos e bidueiros.
O proxecto arqueolóxico, que está moi preto de petróglifos de gran valor como os de Outeiro da Mina, foi desenvolvido pola empresa Citania. O arquitecto encargado de darlle forma foi Marcos Pérez Cachafeiro. A segunda fase do plan será a creación dun centro de interpretación.
