O comité de empresa de Celso Míguez vén de iniciar un peche na sede da compañía en Pontevedra para forzar unha reunión coa dirección na que poder abordar "tanto a débeda salarial existente como o peche de tendas e traslado de persoal que a firma dedicada á venda de pinturas está a levar a cabo sen comunicarllo á representación sindical".
Desde a CIG-Servizos de Pontevedra explican que tiñan solicitada unha reunión para este luns coa empresa, “e como non deron ningunha contestación decidimos presentarnos na sede da rúa Almirante Matos, pero non había ninguén da dirección; por iso decidimos permanecer aquí ata que nos reciban ou nos citen para outro día”.
A representación dos traballadores pretende deste xeito forzar a apertura dun diálogo coa dirección de Celso Míguez para abordar a problemática derivada da "débeda salarial que mantén co cadro de persoal": catro meses de soldo e dúas pagas extras.
Ademais, sinalan que "a empresa está a pechar tendas e trasladando persoal sen comunicarllo ao comité".
