O complexo deportivo da Parda sae do caixón. O Concello contratará este ano o estudo de viabilidade para construír un polideportivo e un pavillón de ximnasia preto da estación de ferrocarril. A iniciativa contará cunha partida de 21.296 euros que tamén está incluída na modificación de crédito de 14,6 millóns de euros que a Corporación municipal aprobará no Pleno deste mes.
O proxecto, anunciado en 2016, acumula un importante atraso. A intención do Goberno local era iniciar os traballos este ano, aínda que é posible que esta previsión non chegue a cumprirse. O orzamento da actuación situaríase en dez millóns de euros.
O anteproxecto do complexo deportivo, elaborado polo estudo de arquitectos Rodríguez+Pintos, contemplaba que o polideportivo da Parda contase cunha capacidade de entre 1.500 e 2.000 persoas. Converteríase así no segundo recinto máis grande de Pontevedra despois do Pavillón Municipal de Deportes, que dispón de 3.000 localidades. A pista desta instalación será máis ampla e polivalente, o que permitiría a práctica de ata tres disciplinas deportivas á vez.
A esta infraestrutura uniríase un anexo para a práctica de ximnasia rítmica e deportiva. Neste último proxecto é no que participaría economicamente a Xunta, aínda que non se descarta que a Deputación apoie esta obra.
O centro deportivo da Parda será moi distinto ao que a empresa Teconsa empezou a construír en 2008 para a Administración autonómica. A concesionaria deixou os traballos a medio facer tras entrar en quebra ao ano seguinte, en 2009.
O Concello tratou de retomar despois, sen éxito, a reforma. Fíxoo cun concurso que prevía tres piscinas ao aire libre, catro pistas de pádel e un gran parque. O contrato quedou deserto.
Multiusos e Pavillón
Tamén se reparará a soleira do Pavillón Municipal de Deportes (313.703,38 euros), que terá novos ascensores (29.9090,55 euros). O arranxo da cuberta do Multiusos da Xunqueira (173.240,20 euros).
