O Concello de Pontevedra abrirá un centro social no local que lle ceda o Instituto de Vivenda, Infraestrutura e Equipamento da Defensa (Invied) en Campolongo. A operación forma parte do convenio urbanístico que asinarán a Administración local e o organismo estatal dependente do Ministerio de Defensa, que suporá a liberalización das 250 vivendas militares que hai en Campolongo.
O acordo entre ambas as institucións, pendente desde 1997, sufriu distintos atrasos. En 2008 empezou a tomar forma a negociación entre Pontevedra e o Invied, pero ata 2019 non se retomou o diálogo. O pasado mes de maio, o Pleno da Corporación municipal aprobou de forma provisional a modificación do plan urbanístico (PXOU) necesario para favorecer esta operación. Unha vez superada a fase de exposición pública, este será ratificado. Será entón cando se efectúe a firma.
Pontevedra tamén recibirá a cambio novas zonas verdes
O convenio non só permitirá sacar ao mercado inmobiliario as vivendas de Campolongo, con preferencia de compra para os seus actuais inquilinos, senón que tamén abrirá a posibilidade de que o organismo estatal constrúa dous novos edificios de seis alturas e baixo cuberta no barrio, así como un aparcadoiro subterráneo. O Invied tamén poderá levantar un terceiro inmoble de cinco alturas na parcela que ten en Rosalía de Castro, á beira do colexio Salvador Moreno, na que hai vivendas militares abandonadas.
Como contrapartidas, o ministerio investirá 750.000 euros na reurbanización de varios terreos e na apertura ao público de zonas que ata agora eran privadas, tanto en Campolongo como en Mollavao. Entre elas figuran novas zonas verdes, vias interiores e outros espazos. Tamén se espera a supresión dos peches que agora rodean os pavillóns residenciais. Un dos compromisos será completar a Rúa Tablada co obxectivo de que teña saída cara a María Vitoria Moreno.
