O Concello de Pontevedra axudará aos seus veciños a tramitar o Ingreso Mínimo Vital impulsado polo Goberno central para facer fronte ao impacto que a crise do coronavirus xerou na poboación desde o punto de vista económico. Farao a través dun servizo que funcionará a partir deste luns nas dependencias da Casa Azul, a sede municipal situada na rúa Sor Lucía.
A concelleira de Benestar Social, Paloma Castro, explicou este domingo a través dun comunicado de prensa que o obxectivo da iniciativa é asistir a aqueles cidadáns que carezan de medios tecnolóxicos e acceso a Internet ou que teñan dificultades para cubrir os formularios esixidos para o cobro desta renda
Unha traballadora social será a encargada de asesorar e resolver as dúbidas sobre a prestación estatal e os pasos a seguir para xestionar as solicitudes. O equipo completarao un informático, que dará asistencia de carácter técnico.
O servizo estará dispoñible a través de cita previa, que os interesados poderán pedir chamando ao teléfono 986 80 43 00 (extensión 7458).
DOCUMENTACIÓN. O Concello reforzará así as catro vías abertas polo Ministerio de Seguridade Social para informar achega do Ingreso Mínimo Vital: un teléfono gratuíto (900 20 22 22), a web da Seguridade Social (www.seg-social.es), o asistente virtual ISSA e un simulador desta prestación.
Para acceder ás axudas, os cidadáns deben presentar a seguinte documentación: o DNI ou NIE; acreditación de residencia legal en España; certificado de empadroamento colectivo e histórico onde consten todas as persoas que viven no domicilio e a súa data de antigüidade; libro de familia; declaración responsable de ingresos e patrimonio e outros documentos que poidan ser necesarios segundo a casuística, como sentenzas de garda e custodia, convenios reguladores ou copias de demandas de separación ou divorcio.
Os formularios coas solicitudes poden presentarse por catro vías: con identificación electrónica, sen esta identificación, por correo postal ou presencialmente nalgún centro da Seguridade Social.
