viernes. 22.01.2021 |
El tiempo
viernes. 22.01.2021
El tiempo

O Concello denuncia a "década perdida" no saneamento da ría de Pontevedra

Zona da ría de Pontevedra onde levarán a cabo os traballos para mellorar a calidade das augas. DAVID FREIRE
Zona da ría de Pontevedra onde levarán a cabo os traballos para mellorar a calidade das augas. DAVID FREIRE

Carme da Silva critica á Xunta por presentar un plan que "inclúe proxectos xa executados polo noso goberno e en funcionamento"

A edil de Ciclo da auga do Concello de Pontevedra, Carme da Silva, compareceu este xoves en rolda de prensa para valorar as propostas que aparecen recollidas no documento resumen do Plan de Saneamento da Ría que a Xunta fíxolle chegar ao Concello e que, segundo dixo, supón "máis dunha década perdida".

Carme da Silva recriminou á Administración autonómica que desde o ano 2010 ata a actualidade a Xunta invista "cero euros no saneamento de Pontevedra e na ría de Pontevedra".

Para o bipartito local, dixo Da Silva, a "sorpresa foi maiúscula" logo de analizar o documento, ao comprobar que as propostas de actuación prioritarias "inclúen e orzan proxectos xa executados polo Concello e en funcionamento" como, por exemplo, o colector do río Gafos.

Ademais, sinalou que tamén hai outras obras previstas que non se corresponden coa realidade e non son executables", porque "non están baseadas en ningún cálculo real", afirmou.

DE MOI "ALTA CALIDADE". Carme da Silva explicou que o estudo realizado pola Xunta recolle que o saneamento de Pontevedra ten un sistema separativo "de moi alta calidade e que funciona moi ben", unha cuestión que a edil incidiu en que é "grazas aos 33,6 millóns de euros que o Concello executou ou está a executar" en actuacións como o mencionado colector do Gafos.

Do mesmo xeito, eloxiou "a continua renovación de servizos que se está realizando paralelamente ás actuacións de mellora urbana" ou os traballos que periodicamente se realizan con mergulladores para solucionar as filtracións de auga do mar na galería de servizos.

A concelleira responsable do Ciclo da auga tamén indicou que o Plan de Saneamento da Xunta inclúe unha serie de estruturas de regulación ao longo do río Gafos que, segundo asegurou Da Silva, "agora os propios técnicos recoñecen que xa non saben se son necesarios ou non", como son o arranxo do colector xeral de Xunqueira de Alba e o arranxo do colector de Cocheiras.

Sobre o colector que vai de Cocheiras á Estación Depuradora de Augas Residuais (Edar) dos Praceres, a concelleira recordou que o problema que existe neste punto "foi provocado polas obras realizadas pola propia Xunta", ao instalar unha tubaxe de menor diámetro do necesario, o que fai que o bombeo sufra un estrangulamiento nese punto.

Carme da Silva finalizou argumentando que nos orzamentos da Xunta non aparece reflectida ningunha partida específica para o Plan de Saneamento da Ría de Pontevedra, pero si unha partida de 518.000 euros para Xestión de pluviais Pontevedra. "Queremos pensar que esa misteriosa partida é para resolver ese problema e que non queren recoñecer publicamente que foi provocado polas súas obras", comentou.

O Concello denuncia a "década perdida" no saneamento da ría de...
comentarios