A Concellería de Residuos Urbanos inicia este luns (20.00 horas) unha campaña informativa entre os establecementos comerciais da cidade para recordarlles o programa de recollida selectiva de cartón e papel porta a porta. Este servizo pretende incrementar a reciclaxe destes materiais "tal e como vén sendo nos últimos anos, nos que se apreza un aumento de entre o 15% e o 20%", explicou o concelleiro Raimundo González.
Operarios da concesionaria, Ferrovial, entregarán un folleto a cada establecemento. O Concello asume desde 2008 o custo do servizo, destinado en exclusiva a todos os locais con actividade económica, especialmente a hostalería e o comercio.
A concesionaria recollerá os restos porta a porta, de luns a venres de 20.00 a 22.00 horas, coincidindo coa hora de peche. González recordou que esta campaña informativa realizouse recentemente no centro histórico e agora esténdese o resto da cidade, "a practicamente todas aquelas rúas onde hai actividade comercial". Se algún establecemento queda fóra do circuíto sinalado no folleto pode contactar coa empresa para ser incluído.
O edil confía en que Pontevedra escale postos no ranking da reciclaxe e para iso é "fundamental" a colaboración do comercio local. Entre xaneiro e agosto deste ano recicláronse 785 toneladas de papel e cartón.
